اسلام آباد (سچ خبریں) وزیراعظم عمران خان نے سیالکوٹ واقعے پر اہم فیصلہ کرتے ہوئے پارلیمان میں بحث کرانے کا فیصلہ کرلیا ، آئندہ ایسے ناگوار واقعات روکنے کے لئے مشترکہ حکمت عملی طے کی جائے، تاہم 20 دسمبر کو سینیٹ اور 22دسمبر کو قومی اسمبلی کا اجلاس طلب کر لیا گیا ہے۔
تفصیلات کے مطابق وزیراعظم عمران خان نے سیالکوٹ واقعے پر پارلیمان میں بحث کرانے کا فیصلہ کرلیا ، اس سلسلے میں وزیراعظم کی ہدایت پر قومی اسمبلی اور سینیٹ کے اہم اجلاس طلب کر لئے گئے ہیں۔ چیئرمین سینیٹ سے مشیر پارلیمانی امور ڈاکٹر بابر اعوان نے مشاورت کی ، 20 دسمبر کو سینیٹ اور 22 دسمبر کو قومی اسمبلی کا اجلاس طلب کر لیا گیا ہے۔
واضح رہے کہ مشیر پارلیمانی امور ڈاکٹر بابر اعوان کا کہنا ہے کہ وزیر اعظم کی ہدایت ہے ایوانوں میں سانحہ سیالکوٹ پربحث کرائی جائے۔ یاد رہے آئی جی پنجاب اور چیف سیکریٹری نے وزیر اعظم عمران خان کو سانحہ سیالکوٹ کی تحقیقات میں پیش رفت پر بریفنگ دی تھی ، جس کے بعد وزیر اعظم نے ہدایت کی تھی کہ آئندہ سانحہ سیالکوٹ جیسے واقعات کو سختی سے روکا جائے، اور ناخوش گوار واقعات روکنے کے لیے مشترکہ حکمت عملی طے کی جائے۔
