وزیراعظم شہباز شریف کا نیشنل اکنامک کونسل تشکیل دینے کا فیصلہ

🗓️ 12 اپریل 2022

اسلام آباد (سچ خبریں)وزیراعظم شہباز شریف نے ملک کو درپیش سنگین صورتحال اور معاشی چیلنجز سے نکلنے کے لئے نیشنل اکنامک کونسل تشکیل دینے کا فیصلہ کرلیا جب کہ ہنگامی بنیادوں پر معاشی تجاویز اور سفارشات کی تیاری کی ہدایات جاری کر دی گئیں۔

تفصیلات کے مطابق وزیراعظم کی زیرصدارت ہونے والے ہنگامی اجلاس میں معاشی ماہرین کو سفارشات کی تیاری کا حکم دیا گیا ، زراعت، صنعت، سرمایہ کاری، بینکاری، تاجر و کاروباری برادری سمیت تمام متعلقہ طبقات کی آراء کی روشنی میں تجاویز مرتب کی جائیں گی ، اس حوالے سے آئندہ چند روز میں سمٹ منعقد کرنے کا فیصلہ کیا گیا ہے۔

بتایا گیا ہے کہ اجلاس میں سیکرٹری خزانہ نے ملکی معاشی صورتحال ، ریونیوز ، بجٹ خساروں ، داخلی اور بیرونی قرضوں کی صورتحال سمیت مجموعی قومی بیلنس شیٹ سے متعلق تفصیلی بریفنگ دی ، اس موقع پر وزیراعظم شہبازشریف نے ہدایت دی کہ معاشی صورتحال اور سنگین مالی خطرات کو دیکھتے ہوئے فوری ، وسط اور طویل المدتی اہداف کا واضح تعین کیا جائے ، پالیسی آپشنز پر جامع سفارشات پیش کریں تاکہ ان کی روشنی میں ٹھوس اقدامات لئے جاسکیں۔

علاوہ ازیں وزیراعظم نے عوام کو ریلیف دینے اور مہنگائی پر قابو پانے کے حوالے سے بھی جامع تجاویز مرتب کرنے کی ہدایت کی ، اس کے ساتھ ساتھ رمضان المبارک میں رمضان بازار کی مانیٹرنگ اور اشیاء ضروریہ کی قیمتوں میں فوری کمی لانے کے لیے بھی خصوصی ہدایات جاری کی گئیں۔ ادھرعالمی ریٹنگ ایجنسی فچ ریٹنگ نے پاکستان میں حکومت کی پر امن تبدیلی کا خیرمقدم کرتے ہوئے معیشت کو درپیش چیلنجز کی نشاندہی کی ہے ، اپنے بیان میں فچ نے کہا ہے کہ اگرچہ پاکستان میں حکومت کی تبدیلی پرامن انداز میں ہوئی تاہم اس سے پاکستان کے لیے قریب مدتی پالیسیوں کے بارے میں بے یقینی میں اضافہ ہوا ہے جسے پہلے ہی عالمی کموڈٹی قیمتوں اور عالمی سطح پر بے یقینی کے سبب بیرونی اور مالیاتی چیلنجز کا سامنا ہے۔