وزیراعظم سے گلگت بلتستان کے قومی ہیروز کی ملاقات، 25، 25 لاکھ کے چیک سے نوازا

?️ 25 اگست 2025

اسلام آباد (سچ خبریں) وزیراعظم شہباز شریف سے گلیشیئر پھٹنے کی پیشگی اطلاع دے کر سیکڑوں جانیں بچانے والے گلگت بلتستان کے تین قومی ہیروز نے ملاقات کی، وزیراعظم نے 25، 25 لاکھ روپےکے چیک دیے۔

وزیراعظم شہباز شریف سے ایوان وزیراعظم میں گلگت بلتستان سے تعلق رکھنے والے تین قومی ہیروز ( جو پیشےکے لحاظ سے چرواہے ہیں ) نے ملاقات کی، جنہوں نے گلگت بلتستان کے علاقے غذر میں گلیشیئر پھٹنے کی بروقت اطلاع دے کر 300 سے زائد جانیں بچائیں۔

وزیراعظم سے ملاقات کرنے والوں میں وصیت خان، انصار اور محمد خان شامل تھے، وزیراعظم نے تینوں افراد سے گفتگو کرتے ہوئے کہا کہ قومی ہیروز کا 24 کروڑ عوام کی جانب سے شکریہ ادا کرتا ہوں۔

اس موقع پر وزیراعظم شہباز شریف نے کہا کہ قوم آپ تینوں ہیروز کیلئے دعا گو ہے، آپ نے احساس ذمہ داری کے ساتھ بروقت اطلاع دے کر انسانی جانیں بچائیں، وزیرِ اعظم نے وصیت خان، انصار اور محمد خان کو حکومت پاکستان کی جانب سے 25 لاکھ روپے کے علیحدہ علیحدہ انعامی چیک بھی پیش کیے۔

وزیراعظم نے ان سے کہا کہ آپ کی پیشگی اطلاع کی بدولت سے علاقے کو بروقت خالی کروا کر سیکڑوں انسانوں کی جانیں بچائی گئیں، انسانی خدمت کا آپ کا یہ اقدام ہمیشہ سنہری الفاظ میں یاد رکھا جائے گا۔

وصیت خان، انصار اور محمد خان نے اس پذیرائی پر وزیر اعظم کا شکریہ ادا کیا اور کہ اکہ اللہ کے فضل و کرم سے وہ انسانی جانیں بچانے میں کامیاب ہوئے، جس پر وہ اللہ کے شکر گزار ہیں۔