موجودہ دور کے ہائبرڈ خطرات سے نمٹنے کیلئے پوری قوم کا متحد ہونا ناگزیر ہے، فیلڈ مارشل

?️ 2 اگست 2025

راولپنڈی: (سچ خبریں) فیلڈ مارشل سید عاصم منیر کا کہنا ہے کہ ’موجودہ دور کے ہائبرڈ خطرات سے نمٹنے کیلئے پوری قوم کا متحد ہونا ناگزیر ہے‘، انہوں نے یہ بات پاکستان آرمی کے بیڑے میں جدید گن شپ ہیلی کاپٹر کی شمولیت کی تقریب سے خطاب کرتے ہوئے کہی۔

تفصیلات کے مطابق پاکستان آرمی کی فضائی قوت میں ایک اور اضافہ ہوا ہے، اس سلسلے میں پاک فوج کے بیڑے میں دشمن کے فضائی و زمینی اہداف کو مؤثر طریقے سے نشانہ بنانے کی صلاحیت رکھنے والے ”Z-10ME“ گن شپ ہیلی کاپٹر کی شمولیت بدلتے ہوئے جنگی ماحول میں نئی پیشرفت ہے۔

مسلح افواج کے شعبہ تعلقات عامہ ( آئی ایس پی آر ) کا کہنا ہے کہ چیف آف آرمی سٹاف فیلڈ مارشل سید عاصم منیر نے ملتان گیریژن کا دورہ کیا، فیلڈ مارشل کی ملتان آمد پر کور کمانڈر ملتان نے ان کا استقبال کیا، جہاں انہوں نے کور ہیڈکوارٹر میں فارمیشن کی آپریشنل تیاریوں اور جاری تربیتی سرگرمیوں پر تفصیلی بریفنگ حاصل کی، آرمی چیف نے پاک فوج کی اعلیٰ پیشہ ورانہ مہارت، تربیتی معیار اور جنگی تیاریوں پر اطمینان کا اظہار کرتے ہوئے ملکی خودمختاری اور علاقائی سالمیت کے دفاع کے عزم کا اعادہ کیا۔

پاک فوج کے ترجمان ادارے کی جانب سے بتایا گیا ہے کہ آرمی چیف نے ملتان گیریژن میں پاک فوج کے لیے جدید Z-10ME اٹیک ہیلی کاپٹر کی شمولیت کی تقریب کی صدارت کی، یہ جدید ترین اور ہر موسم میں دن و رات کام کرنے والا گن شپ پلیٹ فارم جدید ریڈار الیکٹرانک وارفیئر سسٹمز اور ہدف شکن ہتھیاروں سے لیس ہے جو دشمن کے فضائی و زمینی اہداف کو مؤثر طریقے سے نشانہ بنانے کی صلاحیت رکھتا ہے، Z-10ME کی شمولیت کو پاک فوج کی جدید جنگی حکمت عملی اور ایوی ایشن اپ گریڈیشن میں ایک فیصلہ کن پیش رفت قرار دیا گیا ہے۔

آئی ایس پی آر سے معلوم ہوا ہے کہ فیلڈ مارشل عاصم منیر نے مظفرگڑھ فیلڈ فائرنگ رینج میں Z-10ME ہیلی کاپٹرز کی جانب سے کیے گئے فائر پاور مظاہرے کا مشاہدہ کیا، اس موقع پر پاک فوج کے مختلف یونٹس نے ”کمبائنڈ آرمز ٹیکٹکس“ کا شاندار مظاہرہ پیش کیا، آرمی چیف نے جوانوں کے بلند مورال، پیشہ ورانہ مہارت اور جنگی تیاریوں کو سراہا اور کہا کہ پاک فوج بدلتے ہوئے جنگی ماحول میں بھی فیصلہ کن برتری برقرار رکھنے کے لیے پوری طرح تیار ہے، موجودہ دور کے ہائبرڈ خطرات سے نمٹنے کے لیے پوری قوم کا متحد ہونا ناگزیر ہے۔

مسلح افواج کے شعبہ تعلقات عامہ نے بتایا ہے کہ آرمی چیف نے کور ہیڈکوارٹر ملتان میں اپنے دورے کے دوران مختلف علمی و سماجی شخصیات سے بھی ملاقات کی، انہوں نے قومی اتحاد، سول ملٹری ہم آہنگی اور مشترکہ قومی حکمت عملی کی اہمیت پر زور دیا، فیلڈ مارشل نے کہا کہ پاکستان کی قومی خودمختاری اور علاقائی سلامتی کا ہر قیمت پر دفاع کیا جائے گا، پاک فوج کی تربیتی سرگرمیاں قابلِ فخر ہیں، یہ تیاری دشمن کو منہ توڑ جواب دینے کی صلاحیت کو مزید مضبوط بناتی ہے۔