ملک میں کثیرالجہتی چیلنجز کو پہچاننے اور مقابلہ کرنے کیلئے چوکنا رہنا چاہیے۔ فیلڈ مارشل

?️ 23 دسمبر 2025

اسلام آباد (سچ خبریں) فیلڈ مارشل سید عاصم منیر نے نیشنل ڈیفنس یونیورسٹی اسلام آباد کا دورہ کیا۔

پاک فوج کے شعبہ تعلقات عامہ (آئی ایس پی آر) کے مطابق فیلڈ مارشل سید عاصم منیر کا کہنا تھا کہ دشمن داخلی کمزوریوں سے غیر روایتی حربے استعمال کر رہا ہے، دشمن عناصر بالواسطہ اور مبہم طریقوں کو بروئے کار لاتے ہیں۔ اُنہوں نے کہا کہ غیر یقینی صورتحال میں واضح اور بروقت فیصلے انتہائی اہم ہیں، مستقبل کے لیڈروں کو تربیت دی جانی چاہیے، ملک میں ایسے کثیرالجہتی چیلنجز کو پہچاننے اور ان کا مقابلہ کرنے کے لیے چوکنا رہنا چاہیے، غیر یقینی صورتحال میں فیصلہ سازی آج کے سکیورٹی ماحول کے لیے اہم ہے۔

سید عاصم منیر کا مزید کہنا تھا کہ نیشنل ڈیفنس یونیورسٹی اسٹریٹجک قیادت کی تیاری میں کلیدی کردار ادا کر رہی ہے، اُنہوں نے پینلز کے تجزیہ اور نتائج کو سراہا۔ اپنے خطاب میں فیلڈ مارشل نے بدلتے ہوئے عالمی، علاقائی اور داخلی سکیورٹی ماحول کی پیچیدگیوں پر روشنی ڈالتے ہوئے کہا کہ ملک کو ہمہ گیر اور مسلسل چیلنجز کا سامنا ہے۔

انہوں نے واضح کیا کہ یہ چیلنجز روایتی، غیر روایتی، انٹیلی جنس، سائبر، اطلاعاتی، عسکری اور معاشی سمیت متعدد شعبوں پر محیط ہیں، جن سے نمٹنے کے لیے جامع ملٹی ڈومین تیاری، مسلسل موافقت اور قومی طاقت کے تمام عناصر کے درمیان ہم آہنگی ناگزیر ہے۔

خیال رہے دورے کے موقع پر فیلڈ مارشل و چیف آف ڈیفنس فورسز سید عاصم منیر کا این ڈی یو کے صدر نے پرتپاک استقبال کیا۔