مجھے بھی نہیں پتا، نائب وزیر اعظم کا مجوزہ آئینی ترامیم سے متعلق اظہار لا علمی

?️ 15 ستمبر 2024

اسلام آباد: (سچ خبریں) نائب وزیر اعظم اور وزیر خارجہ سینیٹر اسحٰق ڈار نے مجوزہ آئینی ترامیم سے اظہار لا علمی کرتے ہوئے کہا ہے کہ مسودہ میں نے بھی ابھی تک نہیں دیکھا ہے۔

ڈان نیوز کی رپورٹ کے مطابق نائب وزیر اعظم اور وفاقی وزیر قانون اعظم نذیر تارڑ نے پاکستان پیپلز پارٹی کے چیئرمین بلاول بھٹو نے ملاقات کی۔

رپورٹ کے مطابق ملاقات کے دوران دونوں رہنماؤں نے چیئرمین پیپلز پارٹی کو مجوزہ آئینی ترمیم سےمتعلق آگاہ کیا۔

ملاقات کے بعد صحافیوں سے غیر رسمی گفتگو کرتے ہوئے سینیٹر اسحٰق ڈار نے واضح کیا کہ بلاول بھٹو سے ملاقات اچھی رہی۔

ترمیم سے متعلق پوچھے گئے سوال پر نائب وزیر اعظم نے کہا کہ مجوزہ آئینی ترامیم کا مجھے نہیں پتا، میں نے نہیں دیکھیں، اس حوالے سے آپ وزیر قانون سے سوال کریں۔

اس موقع پر جب وزیر قانون سے سوال کیا گیا تو انہوں نے کہا کہ آئینی ترمیم پر کمیٹی فیصلہ کرے گی، اس کے بعد ترامیم سامنے آئیں گی، آئینی ترامیم پہلے کابینہ، پھر ایوان میں لائیں گے، جب کمیٹی اجازت دے تو آپ کو سب بتائیں گے۔

صحافی نے سوال کیا کہ عوامی مفاد اور مہنگائی کے خاتمے کے لیے بھی کبھی رات کو جاگے ہیں، اس پر نائب وزیر اعظم نے جواب دیا کہ آپ کے خیال میں مہنگائی سنگل ڈیجٹ میں ویسے ہی آگئی ہے۔

اسحٰق ڈار کا جمعیت علمائے اسلام (ف) کے سربراہ جے مولانا فضل الرحمٰن کے ساتھ ہونے والی ملاقات کے حوالے سے کہنا تھا کہ سربراہ جے یو آئی سے ملاقاتیں ہوتی رہتی ہیں، جب بھی ضرورت پڑتی ہے، ہم ان سے ملاقات کر لیتے ہیں۔