فواد چوہدری کا بڑا بیان، نوازشریف اور بانی ایم کیو ایم سیاسی لوگ نہیں

?️ 14 مارچ 2021

اسلام آباد(سچ خبریں)وفاقی وزیر برائے سائنس و ٹیکنالوجی فواد چوہدری کا کہنا ہے نوازشریف اور بانی ایم کیو ایم سیاسی لوگ نہیں، نوازشریف پاکستان کے پیسے واپس کریں یا جیل جائیں، اپوزیشن حکومت کے مینڈیٹ کو تسلیم کرکے ہمارے ساتھ بیٹھے، ن لیگ اور پیپلز پارٹی کے ساتھ کیسز پر کوئی مذاکرات نہیں ہوسکتے۔

اسلام آباد میں پریس کانفرنس کرتے ہوئے وفاقی وزیر نے کہا کہ نوازشریف اور بانی ایم کیوایم 1985 کے الیکشن کا تحفہ ہیں، الیکشن میں ہارجیت ہوتی ہے،اس کا مطلب یہ نہیں کہ ریاست کے خلاف بات کریں، نوازشریف اور بانی ایم کیوایم سیاسی لوگ نہیں۔

انہوں نے کہا کہ ہم غداری کے سرٹیفکیٹ دینے کے لیے نہیں بیٹھے، جاوید لطیف شطرنج کا مہرہ ہے، اصل سوچ ان کی ہے جو بانی ایم کیوایم بننا چاہتے ہیں، بانی ایم کیوایم بننے کی خواہش رکھنے والے ان کا انجام بھی دیکھ لیں، بانی ایم کیوایم اور نوازشریف بھی لندن سے واپس نہیں آسکتے۔

فواد چوہدری نے کہا کہ جاوید لطیف کے بیان پر تحریک انصاف سینٹرل پنجاب نے احتجاج کا اعلان کیا ہے،جاوید لطیف کے بیان پر ہر پاکستانی کا دل دکھا ہے، جاوید لطیف سے جو کہلوایا گیا اس پر عوام میں غصہ پایا جاتا ہے۔انہوں نے کہا کہ مریم نواز کی درخواست ضمانت مسترد کرانے کا نیب کا اقدام قابل تحسین ہے۔

انہوں نے کہا کہ سیاسی نابالغوں کے ہاتھوں میں سیاست آگئی ہے، ن لیگ اور پیپلزپارٹی کی قیادت سیاسی فیصلے اپنے ہاتھ میں لے، مریم نواز اور بلاول کو سیاست کا کوئی تجربہ نہیں، پی ڈی ایم لانگ مارچ کومنسوخ کرے۔وفاقی وزیر نے کہا کہ اپوزیشن ہمارے ساتھ بیٹھے،انتخابی اصلاحات پر بات کرے۔

ان کا کہنا تھا کہ اسپیکر انتخابی اصلاحات پر کمیٹی بنانے کو تیار ہیں، ن لیگ اور پیپلزپارٹی علاقائی جماعتیں ہیں وہ مزید کتنی چھوٹی جماعتیں بننا چاہتی ہیں؟ فواد چوہدری نے کہا کہ آپ پلی بارگین کریں پھرچاہیں لندن یا سوئٹرزلینڈ میں رہیں ہماری جان چھوڑیں، نیب کو وسائل کی کمی کا سامنا ہے، نیب اپنا دائرہ وسیع نہ کرےان کیسز پر دھیان دے جس میں عوامی دلچسپی ہے۔