فلسطین کی حمایت ہماری خارجہ پالیسی کا بنیادی اصول ہے: پاکستان

?️ 30 نومبر 2021

سچ خبریں:فلسطین کے ساتھ یوم یکجہتی کے موقع پر پاکستانی وزارت خارجہ نے اس بات پر زور دیا کہ اسلام آباد کی خارجہ پالیسی میں فلسطین کی حمایت ایک اہم اصول ہے اور ہم غاصب صیہونی حکومت کے ظلم و بربریت کا مقابلہ کرنے میں فلسطینی عوام کی حمایت جاری رکھیں گے۔
پاکستانی وزارت خارجہ نے ایک بیان میں کہاکہ پاکستان کی حکومت اور عوام فلسطین کے مظلوم عوام اور ان کی خودمختاری اور خود ارادیت کی جدوجہد کی حمایت جاری رکھیں گے، بیان میں کہا گیا ہے کہ حق خود ارادیت فلسطینی عوام کا ناقابل تنسیخ حق ہے جس سے کبھی انکار نہیں کیا جا سکتا۔

بیان میں کہا گیا ہے کہ فلسطینی عوام کے ساتھ یکجہتی کے موقع پر پاکستان عالمی برادری کے ساتھ مل کر فلسطینیوں کے آزادی کے حق اور اس کے منصفانہ حل کی ضرورت کو تسلیم کرنے کا موقع اٹھا رہا ہے، پاکستانی وزارت خارجہ نے مزید کہاکہ اس ملک کی حکومت اور عوام ایک بار پھر فلسطینی بھائیوں اور بہنوں کے ساتھ یوم یکجہتی مناتے ہیں اور فلسطینی عوام کے لیے انصاف کے قائم کرنے میں اقوام متحدہ کی قراردادوں پر عمل درآمد کا مطالبہ کرتے ہیں اور بین الاقوامی سطح پر اس کی ضرورت پر زور دیتے ہیں جبکہ انسانی ہمدردی کے ادارے مقبوضہ علاقوں میں ہونے والے ظلم پر جواب دہ ہیں۔

انھوں نے مزید کہا کہ پاکستان صیہونی حکومت کو تسلیم نہیں کرتا اور اس نے صیہونی جارحیت اور غاصبانہ قبضے کے خلاف ہمیشہ فلسطین کے مظلوم عوام کی حمایت کی ہے،یادرہے کہ گزشتہ روز پاکستانی جماعتوں نے اسلام آباد میں فلسطینی عوام کے ساتھ اظہار یکجہتی کے لیے ایک کانفرنس کا انعقاد کیا جس میں سیاسی اور مذہبی شخصیات نے شرکت کی اور مقررین نے فلسطینی عوام خصوصاً حماس اور اسلامی جہاد جیسی مزاحمتی جماعتوں کے خلاف مغربی ممالک کے متعصبانہ رویے کی شدید مذمت کی ۔

انہوں نے ناجائز صیہونی حکومت کے خلاف اسلامی اتحاد کے فروغ کو مسئلہ فلسطین کے حل اور اس ملک کے مظلوم عوام کے حقوق کے دفاع کی کلید قرار دیا اور اسرائیل کے خلاف مزاحمتی محاذ کی حمایت کی ضرورت پر زور دیا۔