صدر مملکت کا درخت لگانے کے حوالے سے اہم اعلان

?️ 1 اگست 2021

اسلام آباد(سچ خبریں) پاکستان کے صدر ڈاکٹر عارف علوی نے درخت لگانے کے حوالے سے اہم اعلان کیا ہے کہ انشاء اللہ اس سال ایوان صدر اور اطراف میں 10ہزار درخت لگائیں گے۔انہوں نے عوام سے اپیل کی ہے کہ وہ صاف اور سرسبز پاکستان کی مہم میں شریک ہوں۔

تفصیلات کے مطابق صدر مملکت نے یہ اعلان سماجی رابطے کی ویب سائٹ ٹوئٹر کے ذریعے کیا۔ ان کا کہنا تھا کہ یہ عمل بنیوں کی سنت اور ثواب بھی ہے جس میں ماحولیاتی بہتری بھی ہے۔عارف علوی نے لکھا کہ آپ بھی صاف اور سرسبز پاکستان کی مہم میں شریک ہوں۔

خیال رہے کہ وزیراعظم عمران خان نے اقتدار میں آنے کے بعد باقاعدہ طور پر شجر کاری مہم کا آغاز کیا اور یہ سلسلہ مرحلہ وار جاری ہے جس کے مثبت نتائج بھی سامنے آرہے ہیں۔وزیراعظم کے اس اقدام پر پوری دنیا بھی معترف ہے، عالمی رہنماؤں نے بھی وزیراعظم کے اس اقدام کو سراہا ہے۔ دنیا بھر میں ماحولیات کی بدلتی صورت حال پر ماہرین تشویش کا شکار ہیں۔

زور دیا جارہا ہے کہ ہر ملک شجرکاری مہم کا آغاز کرے تاکہ ماحولیاتی تبدیلی کو روکا جاسکے۔بعض ماہرین کا کہنا ہے کہ  شجر کاری مہم میں ناکامی کی صورت میں پاکستان کے متعدد علاقے بنجر بن جائیں گے، پاکستان کے چھ اضلاع کے بارے میں کہا گیا ہے کہ اگر شجر کاری نہ کی گئی تو 2050 تک یہ اضلاع بنجر بن جائیں گے۔