سیاسی انتشار ختم نہیں کریں گے تو ملک آگے نہیں بڑھے گا، شاہد خاقان عباسی

🗓️ 1 مئی 2025

کوئٹہ: (سچ خبریں) سابق وزیراعظم اور سربراہ عوام پاکستان پارٹی شاہد خاقان عباسی نے کہا ہے جب تک سیاسی انتشار کو ختم نہیں کریں گے تو ملک آگے نہیں بڑھے گا۔

کوئٹہ میں نواب لشکری رئیسانی کے ہمراہ پریس کانفرنس کرتے ہوئے انہوں نے کہا کہ یہ ہمارا رسمی دورہ نہیں، آج پاکستان کی ضرورت ہے کہ لوگ جانیں کہ بلوچستان کے لوگ کیا سوچ رہے ہیں کیوں کہ بلوچستان 10، 15 سالوں سے سانحات کا شکار ہے، آج بلوچستان کی شاہراہیں محفوظ نہیں، بلوچستان کی معیشت متاثر ہو رہی ہے اور نوجوان مایوس ہو رہے ہیں۔

سابق وزیراعظم کہتے ہیں کہ سوچنے کی ضرورت ہے کہ بلوچستان میں یہ معاملات کیوں ہیں؟ یہ ممکن نہیں کہ پاکستان امیر ہو اور بلوچستان غریب رہ جائے، بلوچستان کو پاکستان کا امیر ترین صوبہ ہونا چاہیے، بلوچستان کے وسائل جب تک یہاں کے نوجوانوں کو نہیں ملیں گے تو امن نہیں آئے گا، یہ ممکن نہیں کہ بلوچستان میں لوگ اغوا ہو رہے ہوں، قتل ہو رہے ہوں اور ملک کے معاملات درست چل رہے ہوں، عوام کو حقیقی نمائندگی اور وسائل دینے سے ہی بلوچستان کے مسائل حل ہوں گے۔

عوام پاکستان پارٹی کے سربراہ نے مزید کہا کہ جب تک ملک میں سیاسی انتشار کو ختم نہیں کیا جائے گا تو معاملات آگے نہیں بڑھیں گے، جب تک قانون کی حکمرانی نہیں ہوگی ملک کے معاملات آگے نہیں بڑھیں گے، آئین میں رہ کر وسائل کی تقسیم کرنی ہے اور معاملات کو چلانا ہے، اس سے باہر جائیں گے تو معاملات خراب ہوں گے، دہشت گردی کا مقابلہ ہم پر لازم ہے لیکن یہ معاملات کیوں پیدا ہو رہے ہیں اس کی جڑ تک بھی جانا ہوگا۔ اس موقع پر نواب لشکری رئیسانی نے کہا کہ بلوچستان سے منتخب ہونے والے 99 فیصد لوگ فارم 47 کی پیداوار ہیں، پاکستانی اسٹیبلشمنٹ نے بلوچستان کی حکومت کو مذاق بنا دیا ہوا ہے، اس کی کم تعداد کو وہ کرش کرکے اپنے چھوٹے چھوٹے مفادات حاصل کرنا چاہتے ہیں۔