سپریم کورٹ سے آئینی عدالت کو22 ہزار سے زائد مقدمات منتقل

?️ 20 نومبر 2025

اسلام آباد (سچ خبریں) سپریم کورٹ سے آئینی عدالت کو 22 ہزار سے زائد مقدمات منتقل کردیے گئے۔

وفاقی آئینی عدالت کو مقدمات کی منتقلی کا سلسلہ جاری ہے۔ سپریم کورٹ سے آئینی عدالت کو 22 ہزار سے زائد مقدمات منتقل کردیے گئے۔ آئینی عدالت کو منتقل ہونے والے مقدمات کی تعداد25 ہزار سے تجاوز کرنے کا امکان ہے۔ آرٹیکل184/3کے تحت دائر تمام مقدمات، نظرثانی درخواستیں، آرٹیکل199 کے تحت ہائیکورٹ سے ہونے والے فیصلوں کے خلاف اپیلیں بھی منتقل کردیے گئے۔

دوسری جانب وفاقی آئینی عدالت میں یوٹیلیٹی اسٹور کارپوریشن ملازمین برطرفی کیس میں برطرف سیلز مین مزمل رفیق کوتیاری کیلئے وقت دے دیا گیا۔ جسٹس حسن اظہر رضوی نے ریمارکس دیئے وفاقی آئینی عدالت کو سیاسی اکھاڑا نہ بنائیں آئندہ سماعت پر ستائیس ویں آئینی ترمیم کو پڑھ کرآئیں۔

عدالت نے براہ راست درخواست دائر کرنے پر برہمی کا اظہار کیا۔ جسٹس حسن اظہر رضوی نے کہا کہ لاہور ہائی کورٹ سے برطرفی کے خلاف انٹرا کورٹ اپیل آپ نے واپس لےلی۔ آپ وفاقی عدالت میں ڈائریکٹ درخواست کیسےدائرکرسکتے ہیں؟ کسی وکیل سے مشورہ کرلیں۔

درخواست گزار نے مؤقف اپنایا کہ مجھےعدالت نے انٹرا کورٹ اپیل واپس لینے کی ایڈوائس کی۔ 12 ہزار ملازمین کو فارغ کردیا گیا۔ جسٹس حسن اظہر رضوی نے کہا کہ بارہ ہزار ملازمین کی نہیں آپ اپنی بات کریں۔ یوٹیلیٹی اسٹور سے کروڑوں اربوں روپےکا نقصان ہوا ۔ کتنی خوردبرد پکڑی گئی؟ کیا یہ حکومت کے کرنے کام ہیں؟ یوٹیلیٹی اسٹورسےعوام نے نہیں ۔اسٹاف نے مزے کیے۔ کیس کی سماعت غیر معینہ مدت کیلئے ملتوی کر دی گئی۔