روپے کی قدر میں اضافے کا رجحان جاری، ڈالر 290 روپے سے نیچے آگیا

?️ 26 ستمبر 2023

اسلام آباد:(سچ خبریں) حکومتی اقدامات کے نتیجے میں پاکستانی کرنسی کی قدر بڑھنے کا رجحان جاری ہے، آج بھی انٹربینک مارکیٹ میں ڈالر کی قدر مزید ایک روپے 18 پیسے کم ہو گئی۔

اسٹیٹ بینک کے مطابق انٹربینک مارکیٹ میں روپے کی قدر میں 0.37 فیصد اضافہ ہوا اور ڈالر کی قیمت میں ایک روپے 6 پیسے کمی آئی۔

انٹربینک میں کاروباری دن کے اختتام پر ڈالر 289 روپے 80 پیسے پر بند ہوا جو گزشتہ روز 290 روپے 86 پیسے پر بند ہوا تھا۔

فوریکس ایسوسی ایشن آف پاکستان کے مطابق تقریباً 9 بج کر 48 منٹ پر ڈالر کے مقابلے میں مقامی کرنسی مزید ایک روپے 18 پیسے اضافے کے بعد 289 روپے 78 پیسے پر پہنچ گئی تھی۔

ایکسچینج کمپنیز ایسوسی ایشن آف پاکستان کے مطابق اوپن مارکیٹ میں بھی ڈالر کے مقابلے میں روپے کی قدر بہتر ہونے کے بعد 292 پر لین دین ہو رہی ہے، اوپن مارکیٹ میں ڈالر گزشتہ روز 293 روپے پر بند ہوا تھا۔

ٹاپ لائن سیکیورٹیز کے چیف ایگزیکٹو محمد سہیل نے سماجی رابطے کی ویب سائٹ ایکس (سابقہ ٹوئٹر) پر بتایا کہ انٹربینک مارکیٹ میں روپے کے مقابلے میں ڈالر کی تجارت 290 روپے سے کم پر کی جارہی ہے، 5 ستمبر کو 307 روپے کی کم ترین سطح پر پہنچنے کے بعد پاکستانی کرنسی کی قدر میں 17 روپے کا اضافہ ہو چکا ہے۔

ان کا مزید کہنا تھا کہ اسی طرح اوپن مارکیٹ میں بھی روپے کی قدر 335 روپے سے کم ہو کر 293 روپے کی سطح تک آچکی ہے۔

پاک فوج کی حمایت سے رواں ماہ کے اوائل میں ڈالر کی غیر قانونی تجارت کے خلاف جاری کریک ڈاؤن کے سبب روپے کی قدر میں کمی کا رجحان آج بھی جاری ہے۔