روشن ڈیجیٹل اکاؤنٹس اسکیم  پاکستان کی معیشت کے لیے کتنی مفید ثابت ہو سکتی ہے؟

?️ 28 مارچ 2021

اسلام آباد(سچ خبریں) روشن ڈیجیٹل اکاؤنٹس پاکستان میں تحریک انصاف کی حکومت کی جانب سے متعارف کروائی گئی اسکیم ہے جس کے نتیجہ میں اب تک  بیرون ملک پاکستانیوں کی جانب سے اب تک 67 کروڑ ڈالر سے زائد کی رقم پاکستان آ چکی ہے۔

وزیر اعظم عمران خان نے گذشتہ برس ستمبر کے مہینے میں اس سکیم کا افتتاح کیا تھا جس کے تحت بیرون ملک پاکستانیوں کے سرمائے کو ملک میں لانے کے لیے مراعات کا اعلان کیا گیا تھا۔ اس سکیم کے تحت ایک لاکھ سے زائد روشن ڈیجیٹل اکاونٹس اب تک کھولے جا چکے ہیں۔

متحدہ عرب امارات کی ریاست ابوظہبی کی ایک کمپنی میں تکنیکی شعبے میں کام کرنے والے محمد عارف نے پاکستان میں روشن ڈیجیٹل اکاونٹس کی سکیم کے اجرا کے بعد اپنا اکاونٹ کھلوایا۔عارف نے بتایا کہ اس اکاونٹ کھلوانے کی وجہ اس میں دی گئی مراعات اور اس کے ذریعے سرمایہ کاری کی سہولت ہے، جس کے ذریعے پاکستان میں سٹاک مارکیٹ اور دوسرے شعبوں میں سرمایہ کاری کی جا سکتی ہے۔

تاہم ناروے میں ایک ریسٹورنٹ میں سیفٹی سپر ویژن سے منسلک قاسم رضا کا کہنا ہے کہ روشن ڈیجیٹل اکاونٹ کی سکیم کے آغاز کے بعد انھوں نے آن لائن طریقہ کار کے ذریعے یہ اکاونٹ کھلوانے کے لیے کوشش کی تھی تاہم اس کے لیے درکار شرائط اور طریقہ کار اتنے مشکل تھے کہ انھوں نے بعد میں یہ اکاونٹ کھولنے کا ارادہ ترک کر دیا ہے۔

قاسم نے بتایا کہ انھوں نے ایک نہیں دو تین پاکستانی بینکوں میں ناروے میں بیٹھ کر آن لائن طریقہ کار سے اس اکاونٹ کے لیے کوشش کی تو ہر بینک کی شرائط اور ضروریات مختلف تھیں۔