خواجہ آصف کا بانی پی ٹی آئی کو عجیب مشورہ

?️ 24 جولائی 2024

سچ خبریں: وزیر دفاع خواجہ آصف نے کہا ہے کہ اگر عمران خان معافی مانگ کر دوبارہ سیاسی دھارے میں شامل ہونا چاہتے ہیں تو ہمیں کوئی اعتراض نہیں ہوگا۔

جیو نیوز کے پروگرام "آج شاہزیب خانزادہ کے ساتھ” میں گفتگو کرتے ہوئے وزیر دفاع نے کہا کہ بانی پی ٹی آئی کا احتجاجی کال کا بیان معافی مانگنے کی طرف پہلا قدم ہے،بانی پی ٹی آئی ایک شاطر شخص ہیں۔

یہ بھی پڑھیں: عمران خان نے کہا مجھ سے معافی مانگیں، بجائے میں کسی واقعہ پر معافی مانگوں، بیرسٹر گوہر

انہوں نے کہا کہ بانی پی ٹی آئی اقتدار حاصل کرنے کے لیے کچھ بھی کر سکتے ہیں۔ ابھی ان کی منتوں اور ترلوں کا آغاز ہوا ہے، اور وہ اقتدار کے لیے کسی کے پاؤں بھی پڑ سکتے ہیں۔

لیکن اب ان پر کوئی اعتبار کرنے والا نہیں ہے۔ سب جانتے ہیں کہ جناح ہاؤس پر حملہ کس کے کہنے پر ہوا تھا۔

خواجہ آصف کا کہنا تھا کہ بانی پی ٹی آئی اقتدار کے بغیر نہیں رہ سکتے اور ان سے کسی بھی چیز کی توقع کی جا سکتی ہے۔ اقتدار کے لیے وہ کسی بھی حد تک جا سکتے ہیں، یہاں تک کہ جس کے بارے میں نازیبا گفتگو کی، اسی کے پاؤں پڑے۔

وزیر دفاع نے مزید کہا کہ اگر بانی پی ٹی آئی معافی مانگ لیں تو ہمیں کوئی خطرہ نہیں ہوگا، اگر وہ معافی مانگ کر سیاسی دھارے کا حصہ بن جاتے ہیں تو ہمیں کوئی اعتراض نہیں ہوگا، اصل میں یہ دیکھا جا رہا ہے کہ پانی کتنا گرم ہے۔

مزید پڑھیں: عمران خان نے خاتون جج کو دھمکی دینے پر عدالت سے معافی مانگ لی، فرد جرم سے بچ گئے

دوسری جانب، پیپلز پارٹی کی رہنما شیری رحمان نے کہا کہ پی ٹی آئی والے کیسے کہہ سکتے ہیں کہ 9 مئی کو ہونے والا احتجاج پُرامن تھا؟ ویڈیوز میں سب کچھ واضح نظر آ رہا تھا۔

انہوں نے کہا کہ عمران خان کو اپنی ناک سے آگے کچھ نظر نہیں آتا، ان کی سوچ ہے کہ اگر میں ہوں تو ریاست ہے، پاکستان ہے۔