بھارت نے مقبوضہ کشمیر میں جمہوری اقدار کا خون کیا ہے: بزدار

?️ 15 اگست 2021

لاہور (سچ خبریں)وزیراعلیٰ پنجاب عثمان بزدار کا کہنا ہے کہ دنیا میں سب سے بڑی نام نہاد جمہوریت کے دعویدار بھارت نے مقبوضہ کشمیر میں جمہوری اقدار کا خون کیا ہے، مقبوضہ جموں و کشمیر کے عوام آج بھارتی یوم آزادی پر یوم سیاہ منا رہے ہیں۔ کشمیر پاکستان کے بغیر اور پاکستان کشمیر کے بغیر مکمل نہیں ہو سکتا۔

ایک بیان میں وزیراعلیٰ عثمان بزدار کا کہنا تھا کہ بھارت نے ریاستی دہشت گردی کے ذریعے معصوم کشمیری عوام پر عرصہ حیات تنگ کر دیا ہے۔انہوں نے کہا کہ کشمیر پاکستان کے بغیر اور پاکستان کشمیر کے بغیر مکمل نہیں ہو سکتا، پاکستان اور کشمیر نہ ٹوٹنے والے بندھن میں بندھے ہوئے ہیں۔

ان کا کہنا تھا کہ کشمیری عوام کے ساتھ کھڑے تھے، ہیں اور کھڑے رہیں گے۔وزیر اعلیٰ نے کہاکہ مودی سرکار کو نہتے کشمیری عوام پر ڈھائے جانے والے ظلم و ستم کا حساب دینا ہو گا، عالمی برادری کو اب ہر صورت بیدار ہونا پڑے گا۔

واضح رہے کہ بھارت کے یوم آزادی کو مقبوضہ کشمیر اور آزاد کشمیر میں یوم سیاہ کے طور پر منایا جارہا ہے، مظفرآباد میں بھارت کے خلاف شدید احتجاج کیا گیا۔مظفرآباد میں بھارت کے خلاف آزادی چوک سے سیاہ جھنڈوں کے ساتھ احتجاجی ریلی نکالی گئی، کشمیریوں نے گھڑی پن چوک پر بھارت کے خلاف شدید احتجاج کیا۔

رکن اسمبلی خواجہ فاروق کی قیادت میں بھی بھارت کے خلاف احتجاجی ریلی نکالی گئی۔مظاہرین کا کہنا تھا کہ کشمیر پر قابض ہوکر کشمیریوں پر ظلم ڈھا نے اور بربریت کا مظاہرہ کرنے والے بھارت کو یوم آزادی منانے کا کوئی حق نہیں ہے۔