بھارت خطرناک بحری تیاریوں میں مصروف، علاقائی بالادستی کا خواب دیکھ رہا ہے، عاصم افتخار

?️ 21 مئی 2025

اسلام آباد: (سچ خبریں) اقوام متحدہ میں پاکستان کے مستقل مندوب عاصم افتخار احمد نے کہا ہے کہ بھارت خطرناک بحری تیاریوں میں مصروف ہے۔

ڈان نیوز کے مطابق سلامتی کونسل کے مباحثے کے دوران اپنے خیالات کا اظہار کرتے ہوئے پاکستان کے مستقل مندوب عاصم افتخار احمد نے کہا کہ یہ بات تشویش ناک ہے کہ ایک بڑی طاقت غیر محدود علاقائی بالادستی کے خواب دیکھ رہی ہے۔

انہوں نے کہا کہ بھارت بحری توسیع پسندی اور اہم آبی راستوں پر غلبہ حاصل کرنے کی کوشش کر رہا ہے، پڑوسی ممالک کو علاقائی بحری سلامتی کے ڈھانچوں بالخصوص انڈین اوشین رم ایسوسی ایشن سے خارج کیا جارہا ہے۔

عاصم افتخار نے کہا کہ بھارت کی دریاؤں کو ہتھیانے اور انہیں بطور ہتھیار استعمال کرنے کی روش معاہدوں کی کھلی خلاف ورزی ہے۔

واضح رہے کہ 22 اپریل کو مقبوضہ کشمیر کی وادی پہلگام میں سیاحوں پر حملے کے بعد سے بھارت مسلسل پاکستان کے خلاف الزام تراشی اور پروپیگنڈا کر رہا ہے، 6 اور 7 مئی کی شب پاکستان پر بے بنیاد دراندازی کے جواب میں آپریشن ’بنیان مرصوص‘ کی کامیابی سے بھارت بوکھلاہٹ کا شکار ہے۔

مودی سرکار اس وقت پورے بھارت میں اپنے گودی میڈیا سمیت شدید تنقید کی زد میں ہے، بھارتیہ جنتا پارٹی (بی جے پی) کی حکومت چاہتی ہے کہ کسی طرح پاکستان کی جانب سے حملے میں نقصان کی خفت سے بچا جاسکے، اسی لیے جنگ بندی کے باوجود بھارت خطے میں قابل اعتراض اقدامات کرنے کی کوشش میں ہے۔

اس سے قبل سندھ طاس معاہدے کی معطلی پر پاکستان نے پانی کو 24 کروڑ لوگوں کی ’لائف لائن‘ قرار دیتے ہوئے اسے جنگی اقدام تصور کرنے کا مؤقف دنیا کے سامنے واضح انداز میں رکھا تھا۔