ایک بار خاکروب کی وردی پہن کر بھی دیکھ لیں

?️ 18 مئی 2024

ڈیرہ غازی خان: (سچ خبریں) زرتاج گل نے مریم نواز کو ڈیرہ غازی کا دورہ کرنے اور خاکروب کی وردی پہننے کا چیلنج دے دیا۔ تفصیلات کے مطابق پاکستان تحریک انصاف کی رکن قومی اسمبلی زرتاج گل خان نے وزیر اعلٰی پنجاب مریم نواز کو شدید تنقید کا نشانہ بنایا ہے۔

زرتاج گل وزیر کا کہنا ہے کہ زرتاج گل وزیر کا ٹک ٹاکر وزیر اعلیٰ کو کھلا چیلنج کہ آئیں ڈیرہ غازی خان دورہ کریں،ایک بار خاکروب کی وردی پہن کر بھی دیکھ لیں،ڈیرہ غازی خان جو ن لیگ کے دور حکومت میں گندگی کا ڈھیر بن چکا ہے، اس سے قبل ڈیرہ غازی خان پھلاں دا سہرا ہوا کرتا تھا،آئیں اور اس گند کو سمیٹیں۔

واضح رہے کہ جمعہ کے روز وزیراعلیٰ پنجاب مریم نواز نے ایلیٹ پولیس کی وردی زیب تن کر کے پاسنگ آؤٹپریڈ کی تقریب میں شرکت کی۔

ایلیٹ پولیس ٹریننگ سینٹر میں پاسنگ آؤٹپریڈ کی تقریب سے خطاب کرتے ہوئے وزیراعلیٰ پنجاب مریم نواز نے کہا کہ ایلیٹ فورس کے یونیفارم میں پاسنگ آؤٹ پریڈ میں شرکت کر کے جتنی خوشی آپ کو ہو رہی ہے اتنی ہی خوشی مجھے ہو رہی ہے۔

یہ انتہائی مشکل 6 ماہ کی ٹریننگ تھی، 800 بچے کامیاب ہوئے جن میں 70 خواتین بھی شامل ہیں۔ انہوں نے کہا کہ پریڈ کے معائنے کے دوران آپ کے چہرے پر پاکستانیت دیکھ کر مجھے بطور وزیراعلیٰ انتہائی حوصلہ ملا۔ ایلیٹ فورس نواز شریف اور شہباز شریف کا لگایا ہوا پودا ہے جس میں ابھی تک 17 ہزار نوجوان ٹرینڈ ہوئے۔ آپ سے اظہار یکجہتی کے لیے میں ایلیٹ فورس کا یونیفارم پہن کرآئی ہوں۔

آپ لوگ قوم کے ان چند خوش قسمت بیٹوں اور بیٹیوں میں سے ہیں جن کو یہ وردی پہننا نصیب ہوئی ہے۔ مریم نواز نے کہا کہ ایلیٹ فورس کی پاس آؤٹ ہونے والی خواتین کو خصوصی طور پر شاباش دیتی ہوں۔ سی ایم ہاؤ س کی طرف سے پاس آؤٹ ہونے والوں کے لیے خصوصی کیش پرائز بھجواؤں گی۔ پاس آؤٹ ہونے والی خواتین کے والدین کومبارکباد دیتی ہوں جنہوں نے اپنی بچیوں پر اعتماد کیا اور انہیں ملک کی خدمت کے لیے وقف کیا۔ جب یہ بچیاں قوم کے بیٹوں کے ہمراہ شانہ بشانہ اپنے فرائض ادا کریں گی تو قوم کو ان پر فخر ہوگا۔