اپوزیشن نے اپنے تجربات سے کوئی سبق نہیں سیکھا: سبطین خان

?️ 17 مارچ 2021

لاہور (سچ خبریں) صوبائی وزیر جنگلات سبطین خان نے کہا ہے کہ اپوزیشن نے اپنے تجربات سے ابھی کوئی سبق نہیں سیکھا ہے پی ڈی ایم کا کوئی بھی اقدام اسے مزید رسوا کر سکتا ہے، لانگ مارچ ملتوی کر کے پی ڈی ایم نے اپنی عزت بچا لی، کوئی بھی پارٹی اب اپوزیشن پر اعتماد نہیں کرتی۔

تفصیلات کے مطابق اپنے بیان میں صوبائی وزیر جنگلات سبطین خان نے کہاکہ پی ڈی ایم کی سب تدبیریں ان پر الٹی پڑیں گی،اپوزیشن نے اپنے تجربات سے ابھی تک کوئی سبق نہیں سیکھا۔ لانگ مارچ کے ساتھ بھی وہی حال ہونا تھا جو پی ڈی ایم کے ساتھ اب تک ہوتا آیا ہے۔

سبطین خان نے مزید کہا کہ ہم نے پہلے ہی کہا تھا کہ پی ڈی ایم کی آخری رسومات چل رہی ہیں۔ یہ چند پارٹیوں پر نہیں چند افراد پر مشتمل ٹولہ بن کر رہ گیا ہے۔ کوئی بھی پارٹی فضل الرحمن اینڈ گروپ پر اعتماد کرنے کو تیار نہیں۔ انہوں نے کہا کہ فضل الرحمن (ن) لیگ کو کھلونا بنا کر کھیل رہے ہیں۔

فضل الرحمن کے اللہ اللہ کرنے اور مریم اور بلاول کے ہنسنے کھیلنے کے دن ہیں۔ مریم اور بلاول ابھی طفل مکتب ہیں۔ سیاست ان کے بس کی بات نہیں۔ صوبائی وزیر نے مزید کہا کہ جو سیاسی قیادتیں استعفوں کے معاملے پر اکٹھی نہیں ہو سکیں وہ ملک کیلئے کیا اکٹھے ہوں گے۔

ان کا کہنا تھا پی ڈی ایم میں صرف ن لیگ اور جے یو آئی کا مشترکہ ایجنڈا ہے، باقی سب پارٹیاں اس ایجنڈے سے متفق نہیں۔ سبطین خان نے کہا کہ عوام باشعور ہیں۔ انہیں اب گمراہ کرنے کی کوئی بھی کوشش کامیاب نہیں ہو سکتی۔ اپوزیشن کی قسمت کا فیصلہ عوام ہی کرینگے ۔