آئندہ دو تین سال میں تمام غیر ضروری ٹیکسز ختم کردیں گے: شوکت ترین

?️ 8 نومبر 2021

اسلام آباد (سچ خبریں) مشیر خزانہ شوکت ترین کا کہنا تھا کہ وزیراعظم نے ملکی خدمت کےسلسلے میں کامیاب جوان پروگرام شروع کیا آئندہ دو تین سال میں تمام غیر ضروری ٹیکسز ختم کردیں گے، ملکی ترقی کےلئے سب کو ٹیکس دینا ہوگا  ہمارے پاس تمام افراد کا ڈیٹا موجود ہے۔

تفصیلات کے مطابق مشیر خزانہ شوکت ترین نے کامیاب جوان کنوینشن کی تقریب سے خطاب کرتے ہوئے کہا ہے کہ ملکی آبادی کا 60فیصد 30سال سے کم عمر ہے، نوجوانوں کی استعداد کار میں اضافے سے ملکی ترقی میں انکے کردار کو بڑھانا ہے ، انسانی وسائل پر سرمایہ کاری کرکے ملک ترقی کے منازل تیزی سے طے کرے گا۔

مشیر خزانہ کا کہنا تھا کہ وزیراعظم نے ملکی خدمت کےسلسلے میں کامیاب جوان پروگرام شروع کیا، نوجوانوں کو ہر سہولت کی فراہمی وزیراعظم کا وژن ہے، کامیاب جوان پروگرام نوجوانون کی ترقی میں کلیدی کرداراداکررہاہے۔

پروگرام کے حوالے سے شوکت ترین نے کہا کہ چھوٹے قرضوں کےحصول کیلئے کامیاب پاکستان پروگرام کی بنیادرکھی گئی، ذاتی گھر کے حصول کیلئے27لاکھ روپے تک آسان شرائط پر قرضےدیئےجارہے ہیں۔ان کا کہنا تھا کہ کامیاب پاکستان پروگرام کےتحت 8لاکھ سےزائددرخواستیں موصول ہوئیں، جس میں سے 2لاکھ سے زائد نوجوان کامیاب پاکستان پروگرام کیلئے اہل قرارپائے۔

مشیر خزانہ نے مزید بتایا کہ ایس ایم ای سیکٹرکومالی وسائل کی فراہمی میں بہتری ترجیح ہے، چھوٹے اوردرمیانے درجے کی صعنت کی ترقی پر توجہ دےرہےہیں، آئی ٹی شعبے کی ترقی کیلئے خصوصی اقدامات کئے جارہے ہیں۔

ٹیکس کے حوالے سے شوکت ترین کا کہنا تھا کہ ٹیکس گزار خود ریٹرن برھیں کوئی تنگ نہیں کرےگا،ملکی ترقی کےلئے سب کو ٹیکس دینا ہوگا،ہمارے پاس ٹیکس نہ دینےوالوں کا ڈیٹا آگیا ہے، فلاحی مملکت کا قیام اورملک کو شاندار مستقبل دینا چاہتے ہیں۔

انھوں نے کہا آئندہ دو تین سال میں صرف دو ٹیکسز ہونگے۔۔ ایک انکم ٹیکس اور دوسرا کنزمپشن ٹیکس کے علاوہ تمام غیر ضروری ٹیکسز ختم کردیں گے ، یہ غیر ضروری ٹیکسز ہونے ہی نہیں چاہئے۔ ٹیکس تو ہر ایک کو دینا ہی ہو گا ہمارے پاس تمام افراد کا ڈیٹا موجود ہے۔