افغان امن مسئلہ الزام تراشیوں سے حل نہیں ہو گا: حماد اظہر

?️ 22 جولائی 2021

اسلام آباد (سچ خبریں)وفاقی وزیرِ صنعت و پیداوار حماد اظہرنے افغان نائب صدر امر اللّٰہ صالح کے بیان پر اپنے ردِ عمل کے اظہار کرتے ہوئے کہا ہے کہ افغان امن مسئلہ افغانوں کو حقیقی اور جمہوری حکومت دینے سے ممکن ہے، افغانستان میں امن و امان کا مسئلہ پڑوسی ممالک پر الزام تراشی سےحل نہیں ہو گا۔

تفصیلات کے مطابق سماجی رابطے کی ویب سائٹ ٹوئٹر پر جاری کیئے گئے ایک بیان میں وفاقی وزیر حماد اظہر نے یہ بات کہی ہے۔انہوں نے مزید کہا ہے کہ مسئلے کا حل مسخرے کٹھ پتلیوں کے بجائے افغانون کو حقیقی نمائندگی اور جمہوری حکومت دینے سے ممکن ہے۔وفاقی وزیرِ صنعت و پیداوار حماد اظہر کا یہ بھی کہنا ہے کہ دکھاوا کرنے والے امر اللّٰہ صالح جیسے لوگ عظیم افغان قوم کی تاریخ کا چھوٹا سا حصہ ہیں۔

دوسری جانب وفاقی وزیرِ اطلاعات و نشریات فواد چوہدری کا افغان نائب صدر امر اللّٰہ صالح سے مخاطب ہوتے ہوئے کہنا ہے کہ افغانستان آپ جیسے دغابازوں کا نہیں بلکہ بہادر افغانوں کا ہے۔یہ بات سماجی رابطے کی ویب سائٹ ٹوئٹر پر جاری کیئے گئے ایک بیان میں وفاقی وزیرِ اطلاعات و نشریات فواد چوہدری نے افغان نائب صدر امر اللّٰہ صالح کے بیان پر اپنے ردِ عمل کے اظہار میں کہی ہے۔

انہوں نے افغان نائب صدر سے مخاطب ہوتے ہوئے مزید کہا ہے کہ آپ جیسے مٹھی بھر لوگوں کی افغانستان اور خطے میں دل چسپی کم ہی ہے۔فواد چوہدری نے امر اللّٰہ صالح سے یہ بھی کہا ہے کہ آپ صرف ایک مردار خور ہیں جو وقت آنے پر محفوظ مقام منتقل ہو جائیں گے۔