موبائل فون کی درآمدات میں مسلسل اضافہ:رپورٹ

?️ 17 مارچ 2021

کراچی(سچ خبریں)دنیا بھر میں موبائل فون استعمال کرنے والے صارفین  کی تعداد میں اضافہ ہی ہوتا  جا رہا ہے اور کمپنیوں کو نئے نئے موبائل تیار کر کے فروخت کرنا پڑ رہے ہیں، پاکستان کے محکمہ شماریات کے جاری کردہ اعداد و شمار کے مطابق ملک میں سیل فون کی درآمدات مالی سال 2021 کے پہلے 8 ماہ میں میں 51.5 فیصد اضافے کے ساتھ ایک ارب 31 کروڑ ڈالر ہوگئیں۔

ذرائع کے مطابق سیل فون کمپنی کے ایک عہدیدار نے بتایا کہ موبائل فون مارکیٹ میں اب 10 ہزار سے 40 ہزار روپے کی حد میں اضافے کی مانگ سے کمپنیاں خوش ہیں اور مثبت مسابقت کا ماحول پیدا ہوگیا ہے۔انہوں نے کہا کہ 10 ہزار سے 25 ہزار روپے والے اسمارٹ فونز کی خریداری ہو رہی ہے چونکہ آن لائن تعلیم میں تیزی آئی ہے۔

ان کا کہنا تھا کہ گزشتہ ایک برس میں آن لائن کے ذریعے اشیائے خورونوش کی بڑے پیمانے پر مانگ دیکھنے میں آئی۔عہدیدار نے بتایا کہ کورین اور چینی مینوفیکچررز ہر ایک سے دو ماہ میں ایک سے دو نئے سیل فون پیش کر رہے ہیں جس میں 2/3 جی بی ریم اور 32/64 جی بی اسٹوریج آپشنز ہیں، جن سے لوگوں کو بڑی راحت ملی ہے اور وہ 50 ہزار سے شروع ہونے والے مہنگے سیل فون خرید نہیں سکتے۔

کراچی میں سیل فون بنانے والی کمپنی نے بتایا کہ 2 جی فونز کی اب بھی فروخت جاری ہے کیونکہ بہت سے لوگ 10 ہزار روپے سے زیادہ والے قیمت کے سیل فون نہیں خرید سکتے۔دوسری جانب پاکستان ٹیلی مواصلات اتھارٹی کی ویب سائٹ کے مطابق جولائی 2020 میں 16 کروڑ 80 لاکھ سے جنوری میں سیل فون صارفین کی تعداد 17 کروڑ 80 لاکھ ہوگئی۔