حزب اللہ کو جال میں پھنسانے چلے تھے،خود پھنس گئے:صیہونی اخبار

?️ 27 اپریل 2026

سچ خبریں:صیہونی میڈیا کے مطابق حزب اللہ کے خلاف حکمت عملی ناکام ہو گئی ہے اور اسرائیل خود ایک طویل اور نقصان دہ جنگی دلدل میں پھنس چکا ہے۔

الجزیرہ نیوز چینل کی رپورٹ کے مطابق صہیونی اخبار اسرائیل ہیوم نے اپنی رپورٹ میں لکھا ہے کہ اسرائیل کی فوجی اور سیاسی قیادت اس تشویش میں مبتلا ہے کہ حزب اللہ کو قابو میں کرنے کی بجائے اسرائیل خود ایک طویل اور تھکا دینے والی جنگی دلدل میں پھنس چکا ہے۔

رپورٹ کے مطابق صیہونی وزیراعظم بنیامین نیتن یاہو نے گزشتہ ہفتے فوج کو حزب اللہ کے حملوں کا سخت جواب دینے کا حکم دیا تھا، تاہم زمینی حقائق سے ظاہر ہوتا ہے کہ یہ ردعمل پہلے سے موجود جنگی قواعد کے اندر ہی محدود رہا اور اس میں کوئی بنیادی تبدیلی نہیں آئی۔

اسرائیل ہیوم کے مطابق فوجی ذرائع کا کہنا ہے کہ حالیہ کارروائیاں معمول کے فوجی قواعد کے تحت ہی انجام دی گئی ہیں اور ان میں کوئی غیر معمولی یا فیصلہ کن تبدیلی شامل نہیں ہے۔

فوجی حکام کے مطابق سخت ردعمل کے بیانات زیادہ تر داخلی دباؤ کم کرنے کے لیے دیے جاتے ہیں اور ان کا عملی میدان میں زیادہ اثر نہیں ہوتا۔

رپورٹ میں مزید کہا گیا ہے کہ صیہونی سیاسی قیادت اور فوجی اداروں کے درمیان خلیج بڑھتی جا رہی ہے۔ سیاسی سطح پر فیصلہ کن کامیابیوں کے دعوے کیے جا رہے ہیں، جبکہ فوجی افسران کا کہنا ہے کہ موجودہ کارروائیوں کا مقصد حزب اللہ کو غیر مسلح کرنا نہیں ہے اور موجودہ حالات میں یہ ہدف حاصل کرنا ممکن بھی نہیں۔

فوجی حکام کے مطابق صیہونی فوج سیاسی قیادت کے احکامات پر عمل کر رہی ہے، جبکہ یہ قیادت بین الاقوامی معاہدوں اور خاص طور پر امریکی جنگ بندی کے دباؤ میں بھی کام کر رہی ہے۔

رپورٹ کے مطابق داخلی سطح پر یہ احساس بڑھ رہا ہے کہ سیاسی قیادت ممکنہ ناکامیوں کی ذمہ داری فوج پر ڈالنے کی کوشش کر سکتی ہے، چاہے وہ لبنان کا محاذ ہو یا ایران کا معاملہ۔ اس سے فوجی حلقوں میں یہ تاثر مزید مضبوط ہو رہا ہے کہ انہیں قربانی کا بکرا بنایا جا رہا ہے۔

اسرائیل ہیوم کے مطابق اگرچہ صیہونی فوج جنوبی لبنان کے بعض علاقوں پر کنٹرول رکھتی ہے، لیکن وہ اپنی افواج اور شمالی بستیوں کو مکمل تحفظ فراہم کرنے میں مشکلات کا شکار ہے۔ حزب اللہ اس صورتحال سے فائدہ اٹھاتے ہوئے مسلسل حملے کر رہا ہے، جن میں ایک حالیہ کارروائی کے دوران ایک صیہونی فوجی ہلاک اور کئی زخمی ہوئے۔

رپورٹ میں کہا گیا ہے کہ شمالی اسرائیل کے رہائشی اب بھی مسلسل خطرے میں زندگی گزار رہے ہیں، روزانہ راکٹ فائر اور سائرن کی آوازیں معمول بن چکی ہیں اور صورتحال کے حل کے لیے کوئی واضح راستہ نظر نہیں آ رہا۔

اخبار کے مطابق موجودہ حالات گزشتہ ادوار سے مختلف ہیں، جب تنازعات محدود اور کنٹرول میں ہوتے تھے، جبکہ اب صورتحال زیادہ طویل اور غیر مستحکم ہو چکی ہے۔

رپورٹ کے اختتام پر کہا گیا ہے کہ موجودہ حکمت عملی اسرائیل کو فیصلہ کن برتری دلانے میں ناکام رہی ہے بلکہ یہ جنگ مزید طول پکڑ سکتی ہے اور صورتحال زیادہ خونریز مرحلے میں داخل ہو سکتی ہے، جب تک کہ کوئی سیاسی حل یا حکمت عملی میں تبدیلی نہ آ جائے۔

اسرائیل ہیوم کے مطابق اسرائیل نے سمجھا تھا کہ وہ حزب اللہ کو جال میں پھنسا لے گا، لیکن حقیقت یہ ہے کہ وہ خود اسی جال میں پھنس چکا ہے، اور اگر جلد کوئی راستہ نہ نکالا گیا تو شمالی اسرائیل کے لیے آنے والے موسم بھی ایک طویل اور خونریز جنگ کی علامت بن جائیں گے۔