صیہونی حکومت کی فلسطینی قیدیوں کی رہائی میں رکاوٹیں  

سچ خبریں:اسرائیلی وزیر اعظم بنیامین نتین یاہو کے دفتر نے اس بات کی تصدیق کی ہے کہ اسرائیلی حکومت نے فلسطینی قیدیوں کی رہائی میں رکاوٹیں کھڑی کی ہیں۔  

قطری نشریاتی ادارے الجزیرہ کی رپورٹ کے مطابق اسرائیلی وزیر اعظم بنیامین نتین یاہو کے دفتر نے دعویٰ کیا ہے کہ حماس کی جانب سے مبینہ طور پر معاہدے کی خلاف ورزی کے باعث اسرائیلی حکومت نے فلسطینی قیدیوں کی رہائی کو مؤخر کرنے کا فیصلہ کیا ہے، یہاں تک کہ یہ یقین ہو جائے کہ اسرائیلی قیدیوں کی رہائی کسی توہین آمیز برتاؤ کے بغیر ہوگی۔

اسرائیلی وزیراعظم کے دفتر نے الزام لگایا کہ حماس جان بوجھ کر اسرائیلی قیدیوں کی توہین کر رہی ہے اور انہیں سیاسی اور تشہیری مقاصد کے لیے استعمال کر رہی ہے۔

یہ بھی پڑھیں: صیہونی قیدی کیوں رہا کیوں نہیں ہو رہے ہیں؟

نتین یاہو کے دفتر نے مزید کہا کہ اسرائیل اس وقت تک قیدیوں کے تبادلے کے عمل کو روک دے گا جب تک اس بات کی ضمانت نہ مل جائے کہ مستقبل میں ہونے والے تبادلے کسی بھی قسم کی تضحیک کے بغیر ہوں گے۔

لبنانی نشریاتی ادارے المیادین نے اطلاع دی ہے کہ اسرائیلی میڈیا کے مطابق، فلسطینی قیدیوں کو بسوں میں سوار کیا گیا لیکن بعد میں انہیں دوبارہ اتار کر جیل کی کوٹھریوں میں واپس لے جایا گیا۔

امریکی خبر رساں ادارے اکسیوس نے ایک اسرائیلی عہدیدار کے حوالے سے رپورٹ دی ہے کہ فلسطینی قیدیوں کی رہائی میں تاخیر کا فیصلہ وزیر اعظم نتین یاہو کی قیادت میں ہفتے کی رات منعقدہ دو سیکیورٹی اجلاسوں کے بعد کیا گیا۔

اسرائیلی عہدیدار نے اکسیوس کو بتایا کہ اسرائیلی سیکیورٹی حکام کی سفارش یہ تھی کہ فلسطینی قیدیوں کی رہائی میں تاخیر نہ کی جائے، کیونکہ اس سے اسرائیلی قیدیوں کی واپسی کے عمل پر منفی اثرات مرتب ہو سکتے ہیں۔

مزید پڑھیں: صیہونی قیدیوں کے سلسلہ میں قابض حکومت کی بے حسی

ذرائع کے مطابق، پہلے اجلاس کے بعد اسرائیلی حکام فلسطینی قیدیوں کی رہائی کے حق میں تھے، لیکن دوسرے اجلاس میں، جس میں صرف وزیر اعظم نتین یاہو، وزیر جنگ یسرائیل کاتس، وزیر خارجہ گدعون ساعر اور وزیر خزانہ بزالل اسموتریچ موجود تھے جہاں فیصلہ تبدیل کر دیا گیا۔