سعودی ولیعہد اور امریکی وزیر خارجہ کی ملاقات کا اہم موضوع

سچ خبریں:امریکی وزیر خارجہ مارک روبیو، جو ریاض کے دورے پر ہیں، نے پیر کی رات سعودی ولیعہد محمد بن سلمان کے ساتھ ملاقات کی، دونوں فریقوں نے اسرائیلی قیدیوں کی رہائی اور غزہ میں جنگ بندی کے معاملات پر تبادلہ خیال کیا۔  

الجزیرہ نیوز چینل کی رپورٹ کے مطابق امریکی محکمہ خارجہ نے کہا کہ امریکہ کے وزیر خارجہ مارک روبیو اور سعودی ولیعہد محمد بن سلمان نے ریاض میں جنگ بندی کے معاہدے پر عمل درآمد اور تمام اسرائیلی قیدیوں کی رہائی کے اپنے عزم پر زور دیا۔

یہ بھی پڑھیں: سعودی اور اسرائیلی حکام کی خفیہ ملاقاتوں کا انکشاف

سعودی خبر رساں ایجنسی (واس) نے بھی اعلان کیا کہ بن سلمان نے آج الیمامہ پیلس میں امریکی وزیر خارجہ مارکو روبیو کی میزبانی کی، واس کے مطابق، سعودی ولیعہد نے امریکی وزیر خارجہ اور ان کے وفد کا گرمجوشی سے استقبال کیا اور ان کے ریاض کے دورے پر خوشی کا اظہار کیا۔

دوسری طرف، روبیو نے بھی سعود ولیعہد سے ملاقات اور سعودی عرب میں اپنی موجودگی پر خوشی کا اظہار کیا، واس نے بتایا کہ اس ملاقات میں سعودی عرب اور امریکہ کے درمیان دو طرفہ تعلقات اور مختلف شعبوں میں تعاون کو بڑھانے کے طریقوں پر بات چیت ہوئی۔

اس کے علاوہ، خطے اور بین الاقوامی سطح پر تازہ ترین صورتحال، ان معاملات پر نقطہ نظر کا تبادلہ اور خطے میں امن و استحکام کے لیے کیے گئے اقدامات بھی گفتگو کے اہم محور تھے۔

امریکی وزیر خارجہ نے اس بارے میں کہا کہ ریاض میں غزہ میں جنگ بندی کے عزم پر زور دیا گیا اور معاشی و دفاعی تعاون کو مضبوط بنانے پر تبادلہ خیال کیا گیا۔

 روبیو نے کہا کہ ریاض میں مشترکہ مفادات کو مضبوط بنانے اور استحکام کے حصول پر بھی زور دیا گیا، انہوں نے مزید کہا کہ سعودی عرب میں انہوں نے واشنگٹن کے خطے میں استحکام اور خوشحالی کے عزم پر بھی روشنی ڈالی۔

امریکی وزیر خارجہ نے کہا کہ سعودی ولیعہد اور وزیر خارجہ کے ساتھ ملاقات میں ہم نے غزہ میں جنگ بندی پر عمل درآمد اور تمام اسرائیلی قیدیوں کی رہائی کے اپنے عزم پر زور دیا۔

 انہوں نے کہا کہ سعودی ولیعہد اور وزیر خارجہ کے ساتھ معاشی و دفاعی تعاون کو مضبوط بنانے اور مشترکہ مفادات کی حمایت کے طریقوں پر بھی بات چیت ہوئی۔

اس ملاقات میں سعودی عرب کی طرف سے امریکہ میں سعودی سفیر ریما بنت بندر بن سلطان، وزیر خارجہ فیصل بن فرحان، وزیر مشاور اور قومی سلامتی کے مشیر مساعد بن محمد العیبان اور ولیعہد کے مشیر بندر بن عبید الرشید شامل تھے۔

امریکہ کی طرف سے قومی سلامتی کے مشیرمائیک والتز،امریکی سفارت خانے کی چارج ڈی افیئرز الیسون ڈیلورتھ اور مشرق وسطیٰ کے لیے امریکی خصوصی ایلچی اسٹیو وائٹکوف موجود تھے۔

مزید پڑھیں: کیا سعودی عرب اور امریکہ کے درمیان نیا معاہدہ ہونے والا ہے؟نیوزویک کی رپورٹ

یہ ملاقات سعودی عرب اور امریکہ کے درمیان دو طرفہ تعلقات کو مضبوط بنانے اور خطے کے اہم مسائل، خاص طور پر غزہ اور اسرائیلی قیدیوں کی رہائی کے معاملات پر توجہ مرکوز کرنے کی کوششوں کو ظاہر کرتی ہے۔