شامی عوام نے دہشت گردوں اور ملک کے دشمنوں کے خلاف ایک انقلاب برپا کردیا، بشار اسد کا عوام کے نام اہم پیغام

?️ 29 مئی 2021

دمشق (سچ خبریں) امریکا سمیت متعدد مغربی ممالک کی تمام سازشوں کے باوجود شامی عوام نے ایک بار پھر بشار اسد کو اپنا ہیرو قرار دیتے ہوئے مسلسل چوتھی بات ملک کا صدر منتخب کردیا جس کے بعد بشار اسد نے شامی عوام کے نام اہم پیغام جاری کرتے ہوئے کہا ہے کہ شامی عوام نے دہشت گردوں اور ملک کے دشمنوں کے خلاف ایک انقلاب برپا کردیا جس سے بعد اب وہ ناامید ہوچکے ہیں۔

تفصیلات کے مطابق شام کے صدر بشار اسد نے انتخابات میں فتح کے بعد عوام سے خطاب میں کہا کہ شامی عوام نے اس انتخابات میں دہشت گردی اور ملک دشمن لوگوں کے خلاف واقعی انقلاب کر دیا۔

انہوں نے جمعے کی شام ٹیلویژن سے نشر ہونے والے اپنے پہلے خطاب میں کہا کہ انتخابات میں عوام کی شرکت، ملکی دشمنوں کے لئے بڑا چیلنج اور ان کے غرور اور تکبر کو دھول میں مٹانے والی تھی۔

شامی صدر بشار اسد کا کہنا تھا کہ شام کے عوام نے ملک دوستی کا ایک بار پھر ثبوت دیا ہے اور اسی کے ساتھ ملک سے غداری بھی ایک بار پھر ثابت ہوگئی۔

ان کا کہنا تھا کہ آپ لوگوں کی خدمت کے لئے میرا انتخاب، میرے لئے بڑی فخر کی بات ہے جو صرف اور صرف اس قوم کا خاصہ ہے۔

دوسری طرف شام میں صدارتی انتخابات کے کامیاب انعقاد اور صدر بشار اسد کی کامیابی پر ایران نے اس ملک کے عوام اور حکومت کو مبارک باد پیش کی ہے۔

جمعے کو ایران کی وزارت خارجہ نے ایک بیان جاری کرکے کہا کہ کامیاب انتخابات کا انعقاد اور عوام کی وسیع شرکت، شام میں قیام امن کے راستے میں اہم قدم ہے۔

ایران کا کہنا ہے کہ ملک کے مستقبل کے تعین میں شامی عوام کے کردار کا تہران احترام کرتا ہے اور کسی بھی طرح کی غیر ملکی مداخلت کو مسترد کرتا ہے۔

واضح رہے کہ شام کے پارلیمنٹ کے اسپیکر حمودا صباغ نے جمعے کو ایک پریس کانفرنس میں بشار اسد کی فتح کا اعلان کرتے ہوئے کہا کہ بشار اسد نے 95.1 فیصد ووٹ حاصل کئے۔