صومالیہ کے صدر کی اسرائیلی مداخلت پر شدید تنقید؛ پورے افریقہ کے لیے خطرہ قرار

?️ 7 فروری 2026

سچ خبریں:صومالیہ کے صدر نے اسرائیل کی غیرقانونی مداخلت کو نہ صرف اپنے ملک بلکہ پورے افریقی براعظم کے لیے چیلنج قرار دیا اور عالمی برادری سے بین الاقوامی قوانین کے دفاع کا مطالبہ کیا۔

صومالیہ کے صدر نے اپنے ملک کے داخلی امور میں اسرائیلی مداخلت پر سخت تنقید کرتے ہوئے اسے نہ صرف صومالیہ بلکہ پورے افریقی براعظم کے لیے ایک سنگین چیلنج قرار دیا ہے۔

یہ بھی پڑھیں:امریکی مداخلت پسندی، عالمی عدم استحکام اور واشنگٹن کی خارجہ پالیسی کے خطرناک نتائج

الجزیرہ کے حوالے سے خبررساں ادارے مہر کی رپورٹ کے مطابق، صومالیہ کے صدر نے زور دیتے ہوئے کہا کہ عالمی برادری کو بیدار ہونا چاہیے اور ان عناصر کے خلاف کھڑا ہونا چاہیے جو بین الاقوامی قوانین کی خلاف ورزی کرتے ہیں۔

انہوں نے مزید کہا کہ صومالیہ اس وقت القاعدہ اور داعش جیسے دہشت گرد گروہوں کے خلاف جنگ لڑ رہا ہے، لیکن خطے میں عدم استحکام پیدا کرنے والی کارروائیاں، خصوصاً اسرائیل کی مداخلت، علاقائی سلامتی کو شدید نقصان پہنچا رہی ہیں۔

صومالی صدر نے واضح کیا کہ اسرائیل کی جانب سے صومالیہ میں مداخلت غیرقانونی ہے اور یہ صرف ہمارے ملک کے لیے نہیں بلکہ پورے افریقہ کے لیے ایک بڑا خطرہ ہے۔

انہوں نے خبردار کیا کہ کسی بھی ایسی کوشش کی سخت مخالفت کی جانی چاہیے جو موجودہ بین الاقوامی نظام کو تبدیل کرنا چاہے، اور طاقت کے ذریعے معاملات طے کرنے کی روش کو واپس نہیں آنا چاہیے۔ فلسطین کے مسئلے پر بات کرتے ہوئے انہوں نے کہا کہ دو ریاستی حل کی بنیاد پر ایک مستقل اور جامع معاہدہ ناگزیر ہے۔

مزید پڑھیں:صومالی: اسرائیل کی ہارن آف افریقہ میں آبی گزرگاہوں کو کنٹرول کرنے کی کوشش

قابلِ ذکر ہے کہ حال ہی میں اسرائیلی حکومت نے صومالیہ کے علیحدگی پسند علاقے صومالی لینڈ کو غیرقانونی طور پر تسلیم کیا تھا، جس پر عالمی سطح پر شدید ردعمل سامنے آیا تھا۔