غزہ میں ایندھن کی شدید کمی؛ اسپتال موت کے گڑھ 

سچ خبریں:غزہ میں جنگ اور مسلسل محاصرے کے باعث 80 فیصد اسپتال بند ہو چکے ہیں اور باقی بچے ہوئے اسپتال بھی ایندھن کی شدید کمی کے سبب تقریباً مفلوج ہو چکے ہیں۔ فلسطینی طبی ذرائع نے خبردار کیا ہے کہ اسرائیلی قابض افواج جان بوجھ کر غزہ میں ایندھن کی فراہمی روک رہی ہیں جس کے نتیجے میں اسپتال مریضوں اور زخمیوں کے لیے قبرستان بن رہے ہیں۔

یہ بھی پڑھیں: صہیونی فوج کا غزہ کے اسپتالوں پر بمباری سلسلہ جاری

غزہ کے اسپتالوں کے فیلڈ ڈائریکٹر ڈاکٹر مروان الهمص نے خبر رساں ایجنسی شهاب کو بتایا کہ اس وقت غزہ کے اسپتال محض 15 سے 20 فیصد صلاحیت پر کام کر رہے ہیں اور اگر فوری طور پر ایندھن نہ پہنچا تو انتہائی نگہداشت میں موجود سینکڑوں مریض اور بچے، جو وینٹی لیٹر اور بجلی پر منحصر ہیں، اپنی جان سے ہاتھ دھو بیٹھیں گے۔

انہوں نے کہا کہ ہم روزانہ ایسے سینکڑوں زخمیوں کی زندگیاں بچانے سے قاصر ہیں جو صہیونی جارحیت کے نتیجے میں اسپتالوں تک پہنچتے ہیں، زیادہ تر وارڈ اندھیرے میں کام کر رہے ہیں، اور عملے کو بجلی کی شدید قلت کے باعث آپریشن تھیٹر اور آئی سی یو کی کارکردگی کے لیے بجلی کی سپلائی کو محدود کرنا پڑ رہا ہے۔”

غزہ کے سب سے بڑے اسپتال، شفا کمپلیکس، کے متعلق ڈاکٹر منیر البرش (ڈائریکٹر جنرل، محکمہ صحت غزہ) نے خبردار کیا کہ ایندھن کی کمی کے باعث اسپتال عنقریب مکمل اندھیرے میں ڈوب جائے گا اور مریضوں کے لیے صرف چند گھنٹے ہی بچے ہیں۔ شفا اسپتال کی انتظامیہ کے مطابق، فی الوقت ایندھن کا ذخیرہ صرف ایک دن کے لیے باقی ہے اور اگر فوری سپلائی نہ پہنچی تو اسپتال مکمل طور پر بند ہو جائے گا۔

اسپتال میں بجلی کی فراہمی معطل ہونے سے انتہائی نگہداشت کے مریض، نوزائیدہ بچے اور آپریشن کے منتظر زخمی شدید خطرے میں ہیں۔ اسپتال انتظامیہ نے اعلان کیا ہے کہ ہم انسانی المیے کے دہانے پر کھڑے ہیں اور اب صرف بین الاقوامی برادری کی فوری مداخلت ہی اس بحران کو ٹال سکتی ہے۔

ڈاکٹر مروان الهمص نے مزید بتایا کہ غزہ میں 95 فیصد پانی کی کمی ہو چکی ہے، آبادی کے پاس نہ پینے کا پانی ہے، نہ صفائی کے لیے اور نہ ہی نہانے کے لیے۔ پانی صاف کرنے والے پلانٹس بند ہو چکے ہیں اور کچرے کے ڈھیر میں اضافے کے سبب متعدی امراض پھوٹنے کا خطرہ ہے، اگر فوری طور پر جنگ نہ روکی گئی اور ایندھن، پانی و طبی سازوسامان کی فراہمی نہ ہوئی تو غزہ کے 22 لاکھ سے زائد افراد کی جانیں شدید خطرے میں ہیں۔

اسرائیلی فوج نے اقوام متحدہ اور عالمی ادارہ صحت کو بھی ان ایندھن کے ذخائر تک رسائی سے روک دیا ہے جن میں لاکھوں لیٹر ایندھن موجود ہے، اگر بجلی مکمل طور پر بند ہو گئی تو اسپتالوں میں قتل عام جیسی صورتحال پیدا ہو جائے گی، جو صرف صحت کے شعبے تک محدود نہیں رہے گی بلکہ پورے شہر کو اپنی لپیٹ میں لے لے گی۔

مزید پڑھیں: غزہ کے اسپتالوں میں طبی خدمات بند ہونے کا خطرہ

وزارت صحت غزہ نے خبردار کیا ہے کہ اسرائیل کی طرف سے ایندھن کی ترسیل روکنے سے صحت کا نظام مکمل طور پر تباہی کے دہانے پر ہے، اور ہر گزرتے لمحے اس انسانی بحران کی شدت میں اضافہ ہو رہا ہے۔