فلسطین کو تسلیم کرنا انصاف کی آواز کا احترام ہے: ترک صدر

سچ خبریں:ترکی کے صدر رجب طیب اردوغان نے کہا ہے کہ فلسطین کو ایک آزاد ریاست کے طور پر تسلیم کرنا دراصل انصاف کی آواز کا احترام ہے۔

قطری چینل الجزیرہ کی رپورٹ کے مطابق، ترکی کے صدر رجب طیب اردوغان نے اپنی تقریر میں کہا کہ میں ان تمام ممالک کو مبارکباد پیش کرتا ہوں جو فلسطین کو تسلیم کرنے کا ارادہ رکھتے ہیں، کیونکہ انہوں نے انصاف کی صدا کو لبیک کہا ہے۔

انہوں نے مزید کہا کہ غزہ کی پٹی میں انسانی المیہ روز بروز بڑھ رہا ہے اور اسرائیلی حملے جاری ہیں،  ان کے بقول، نیتن یاہو کا مقصد یہ ہے کہ فلسطینی ریاست کے قیام کو ناممکن بنا دیا جائے، لیکن آج فلسطین کی آواز ایک عالمی مسئلے میں تبدیل ہوچکی ہے۔

یہ بھی پڑھیں:دنیا فلسطین کو ریاست تسلیم کر رہی ہے، یہ عمل اب ناقابلِ واپسی ہے

اردوغان نے کہا نیتن یاہو اپنے ہمسایوں کے خلاف نسل کشی کر رہا ہے اور اسرائیلی جبر کے خلاف ڈٹ جانا ایک اخلاقی ذمہ داری ہے۔

انہوں نے واضح کیا کہ اسرائیل دو ریاستی حل کو نابود کرنے کی کوشش میں ہے اور تل ابیب خطے میں بدامنی پھیلانے کے درپے ہے، ضروری ہے کہ فوری جنگ بندی ہو اور اسرائیلی افواج غزہ کی پٹی سے نکل جائیں۔

یاد ہرے کہ فلسطینی ریاست کے باضابطہ قیام کے لیے دو ریاستی حل کے عنوان سے کانفرنس نیویارک میں پیر کی رات شروع ہوئی، یہ اجلاس فرانس اور سعودی عرب کی میزبانی میں منعقد ہورہا ہے جس میں دنیا کے درجنوں ممالک کے رہنما شریک ہیں۔

اس کانفرنس کا مقصد دو ریاستی حل کے لیے حمایت حاصل کرنا ہے اور توقع ہے کہ متعدد ممالک فلسطین کو باضابطہ طور پر تسلیم کریں گے، یہ اقدام اسرائیل اور امریکہ کی جانب سے سخت ردِعمل کا باعث بن سکتا ہے، اجلاس کا آغاز فرانسیسی صدر امانوئل ماکرون کی تقریر سے ہوا۔

مزید پڑھیں:ایک اور یورپی ملک نے آزاد فلسطینی ریاست کو تسلیم کر لیا

اردوغان نے امریکی نشریاتی ادارے فاکس نیوز کو انٹرویو دیتے ہوئے کہا کہ وہ امریکی صدر ڈونلڈ ٹرمپ سے ملاقات میں ایف-35 جنگی طیاروں کے معاہدے پر بات کریں گے۔

انہوں نے ایک بار پھر کہا کہ غزہ میں جو کچھ ہو رہا ہے وہ کھلی نسل کشی ہے اور اس کے ذمہ دار براہِ راست نتانیاہو ہیں۔