استنبول کے سابق میئر کی گرفتاری کے ایک ماہ بعد ترکی میں احتجاجی مظاہرے دوبارہ شروع

سچ خبریں:ترکی کے استنبول شہر کے معزول میئر، اکرم امام اوغلو کی گرفتاری کے خلاف اس ملک کے دارالحکومت انقرہ اور تجارتی مرکز استنبول میں ایک ماہ کے وقفے کے بعد ایک بار پھر احتجاجی مظاہرے شروع ہو گئے ہیں۔ 

المیادین نیوز چینل کی رپورٹ کے مطابق یہ مظاہرے استنبول کے معزول میئر، اکرم امام اوغلو کی گرفتاری کے خلاف کیے جا رہے ہیں، جنہیں 19 مارچ کو مبینہ کرپشن اور دہشت گردی میں ملوث ہونے کے شبے میں ان کے گھر سے گرفتار کیا گیا تھا۔

یہ بھی پڑھیں:ترکی میں سیاسی بحران؛ استنبول میں کشیدگی اور ہنگامہ آرائی کا سلسلہ جاری

 رپورٹ کے مطابق، امام اوغلو کی برطرفی ترک صدر رجب طیب اردوان کے سخت ترین سیاسی مخالف کی سیاسی سرگرمیوں کا خاتمہ سمجھی جا رہی ہے، تاہم اس فیصلے کے خلاف نوجوانوں کی مزاحمت اور آواز اب بھی جاری ہے۔

استنبول میں مظاہروں کا آغاز گرفتاری کے بعد پہلے ہفتے میں ہوا جہاں ہزاروں افراد روزانہ استنبول میونسپلٹی کے باہر جمع ہوتے رہے۔ یہ مظاہرے ترکی میں 2013 کے مشہور گیزی پارک مظاہروں کے بعد سب سے بڑے عوامی احتجاج قرار دیے جا رہے ہیں۔

گزشتہ دس دنوں سے یہ مظاہرے دوبارہ استنبول اور انقرہ کی یونیورسٹیوں میں زور پکڑ گئے ہیں، جہاں طلبہ حکومت کی پالیسیوں اور آزادیوں پر قدغن کے خلاف سراپا احتجاج ہیں۔

حالیہ دنوں میں ان مظاہروں کا دائرہ درجنوں اسکولوں اور ہائی اسکولز تک پھیل چکا ہے، جہاں طلبہ اور اساتذہ حکومت کے کچھ اساتذہ کو ہٹانے کے فیصلے پر ناراض نظر آتے ہیں۔ ناقدین کا کہنا ہے کہ یہ فیصلے تعلیمی اداروں پر کنٹرول بڑھانے کی کوشش کا حصہ ہیں۔

استنبول کی یدی تپہ یونیورسٹی کے سماجیات کے پروفیسر دیمیت لوکوسلو نے فرانسیسی خبر رساں ادارے فرانس پریس کو بتایا کہ نوجوانوں میں بے چینی پہلے سے موجود تھی، لیکن مارچ کے وسط سے یہ ناراضی کھل کر سامنے آ گئی ہے۔

ان کے مطابق کئی نوجوان حکومتی قدامت پسند نظریات سے اختلاف رکھتے ہیں اور اپنے حقوق و آزادیوں کے خواہاں ہیں۔

مزید پڑھیں: ترکی میں اقتصادی بحران پر سیاسی تناؤ کا اثر

قابل ذکر ہے کہ امام اوغلو کو 23 مارچ کو ترکی کی ایک عدالت نے کرپشن کے الزام میں قید کی سزا سنائی تھی، جس کے بعد ملک بھر میں مظاہروں کی نئی لہر شروع ہو گئی تھی۔