بھارت کے ساتھ ایٹمی جنگ کا امکان نہیں:خواجہ آصف

اسپوٹنک نیوز ایجنسی کی رپورٹ کے مطابق، خواجہ آصف نے ایک انٹرویو میں کہا کہ پہلگام حملے کے بعد اگرچہ بھارت اور پاکستان کے درمیان تناؤ بڑھا ہے، لیکن ان کا ماننا ہے کہ یہ کشیدگی ایٹمی تصادم میں تبدیل نہیں ہوگی۔

یہ بھی پڑھیں:پاک بھارت کشیدگی؛ پیٹرولیم مصنوعات کی وافر مقدار ذخیرہ کرنے کے احکامات جاری

انہوں نے کہا کہ میرا نہیں خیال کہ یہ جنگ ایٹمی تبادلے تک پہنچے گی۔ بھارت اور پاکستان دونوں ایٹمی طاقتیں ہیں، مگر حالات اس نہج تک جانے کا امکان نہیں۔

یہ بیانات اس حملے کے بعد سامنے آئے جس میں بھارتی زیرانتظام کشمیر کے علاقے پہلگام میں کم از کم 26 سیاح ہلاک اور متعدد زخمی ہوئے۔

اس حملے کی ذمہ داری کشمیر مزاحمتی محاذ نامی ایک گروپ نے قبول کی ہے، جسے بھارت ایک دہشت گرد تنظیم قرار دیتا ہے۔

پہلگام حملے کے جواب میں، بھارت نے پاکستان کے ساتھ 1960 میں طے پانے والے تاریخی معاہدہ آب (انڈس واٹر ٹریٹی) کو معطل کرنے کا فیصلہ کیا ہے۔

بھارتی وزیر داخلہ امیت شاہ کی رہائش گاہ پر ہونے والے اجلاس میں وزیر خارجہ ایس. جے شنکر اور وزیر آبی وسائل سی آر پاٹل بھی شریک ہوئے۔ اس اجلاس میں پاکستان کے خلاف تین مراحل پر مبنی حکمت عملی پر اتفاق کیا گیا۔

بھارت نے نئی دہلی میں پاکستانی سفارت خانے میں موجود فوجی مشیروں کو ملک چھوڑنے کا حکم دیا، جبکہ پاکستان نے بھی جوابی اقدام میں اسلام آباد میں تعینات بھارتی فوجی مشیروں کو ناپسندیدہ عناصر قرار دے کر 30 اپریل تک ملک چھوڑنے کی مہلت دی ہے۔

پاکستان نے بھارت کے ساتھ تمام تجارتی تعلقات حتیٰ تیسرے ملک کے ذریعے ہونے والی تجارت کو بھی معطل کر دیا ہے۔

الجزیرہ کے مطابق، پاکستان نے یہ بھی واضح کر دیا ہے کہ دریائے سندھ کے مغربی حصے میں اگر بھارت نے کسی قسم کی خلاف ورزی کی تو اسے جنگی اقدام تصور کیا جائے گا۔

مزید پڑھیں:کشیدگی بڑھانا نہیں چاہتے لیکن حملہ ہوا تو اس سے بڑا جواب دیں گے، وزیر دفاع

علاوہ ازیں، پاکستان نے بھارتی طیاروں کے لیے اپنی فضائی حدود بند کر دی ہے اور اسلام آباد میں موجود بھارتی ہائی کمیشن کے عملے کی تعداد کو 30 اپریل تک محدود کرنے کا فیصلہ کیا ہے۔