نیتن یاہو کی نئی ایران جنگ کے ذریعے آیزنکوٹ کی حکومت روکنے کی سازش

?️ 14 نومبر 2026

سچ خبریں:صیہونی وزیر اعظم بنیامین نیتن یاہو کے مخالف رہنماؤں کو خدشہ ہے کہ وہ عبوری دور کو ایران کے خلاف دوبارہ فوجی کشیدگی شروع کرنے کے لیے استعمال کر سکتے ہیں، تاکہ گادی آیزنکوٹ کی سربراہی میں نئی حکومت کی تشکیل ناکام بنائی جا سکے۔

المانیٹر کے مطابق، صیہونی حکومت کے مخالف رہنماؤں کو تشویش ہے کہ بنیامین نیتن یاہو اسرائیل کو ایران کے ساتھ دوبارہ فوجی محاذ آرائی کی طرف دھکیل سکتے ہیں، جس کا مقصد یشار پارٹی کے سربراہ گادی آیزنکوٹ کی قیادت میں نئی کابینہ کی تشکیل کو روکنا ہے۔

دوسری جانب، ویب سائٹ ایکسیوس نے جمعے کے روز تین باخبر ذرائع کے حوالے سے بتایا کہ صیہونی موساد کے سربراہ رومان گوفمن اس وقت واشنگٹن میں موجود ہیں۔ اپنے دورے کے دوران انہوں نے امریکی سینٹرل انٹیلی جنس ایجنسی (سی آئی اے) کے سربراہ جان ریٹکلف سے ملاقات کی ہے، جبکہ امریکی وزیر خارجہ مارکو روبیو سے بھی ان کی ملاقات متوقع ہے۔ اس کے علاوہ امکان ہے کہ وہ وائٹ ہاؤس کے خصوصی ایلچی اسٹیو وٹکوف سے ملاقات کے لیے میامی بھی جائیں گے۔

یہ سفارتی سرگرمیاں نیتن یاہو کی ان کوششوں کا حصہ قرار دی جا رہی ہیں جن کے ذریعے وہ امریکی صدر ڈونلڈ ٹرمپ پر ایران کے خلاف فوجی کارروائیاں دوبارہ شروع کرنے کے لیے دباؤ ڈالنا چاہتے ہیں۔

المانیتور سے گفتگو کرنے والے سیاسی ذرائع کے مطابق، مقبوضہ فلسطینی علاقوں میں سیاسی غیر یقینی صورت حال اور ایران کے حوالے سے ٹرمپ کے بدلتے ہوئے مؤقف نے صیہونی عوام میں بے چینی بڑھا دی ہے۔ تین سالہ جنگ اور 27 اکتوبر کے غیر واضح انتخابی نتائج نے بھی صیہونی معاشرے کو تھکا دیا ہے۔

اس سیاسی کشمکش کے تازہ ترین مرحلے میں نیتن یاہو نے جمعرات کو آیزنکوٹ سے ملاقات کی اور انہیں ایران کے مبینہ مسلسل خطرے سے آگاہ کیا۔ یہ ملاقات اس وقت ہوئی جب آیزنکوٹ اور ان کے اتحادیوں نے خبردار کیا تھا کہ نیتن یاہو عبوری دور سے فائدہ اٹھا کر ایران کے خلاف جنگ دوبارہ شروع کر سکتے ہیں۔

28 اکتوبر سے آیزنکوٹ اور ان کے اتحادی، اسرائیل بیتنا پارٹی کے سربراہ آویگدور لیبرمین، اس حوالے سے کھلے عام انتباہات جاری کر رہے ہیں۔ دونوں رہنماؤں نے حکومت کی قانونی مشیر گالی بہراو میارا کو خطوط بھی ارسال کیے ہیں، جن میں مؤقف اختیار کیا گیا ہے کہ عبوری حکومت کے سربراہ کی حیثیت سے نیتن یاہو کو اتنا سنگین فوجی فیصلہ کرنے کا اختیار حاصل نہیں ہے۔

ذرائع نے مزید کہا کہ قومی ہنگامی حالت کا اعلان نیتن یاہو کو ایک ایسا جواز فراہم کر سکتا ہے جس کے ذریعے وہ اپنے سیاسی مخالفین کی حمایت حاصل کرکے بھی اقتدار میں برقرار رہ سکیں۔