نیتن یاہو کا بیروت پر حملہ؛ ایران-امریکہ مذاکرات کو ناکام بنانے کی کوشش

سچ خبریں:لبنانی اخبار کے مطابق، بیروت کے ضاحیہ پر صہیونی حملہ نیتن یاہو  کی جانب سے ایران اور امریکہ کے درمیان جاری مذاکرات کو سبوتاژ کرنے اور لبنان پر نئی جنگی شرائط مسلط کرنے کی کوشش ہے۔

لبنان کے ایک معتبر اخبار الجمهوریہ نے اپنی رپورٹ میں دعویٰ کیا ہے کہ صہیونی حکومت کی جانب سے گزشتہ روز بیروت کے جنوبی علاقے ضاحیہ پر کیا گیا حملہ، دو بنیادی اہداف کے تحت انجام پایا۔

یہ بھی پڑھیں:ایران نے امریکہ کو بالواسطہ مذاکرات کی تجویز کیوں دی؟

پہلا ہدف لبنان پر نئی جنگی شرائط مسلط کرنا تھا، جسے نہ لبنانی حکومت اور نہ ہی مزاحمتی قوتیں قبول کریں گی۔

دوسرا مقصد اسلامی جمہوریہ ایران اور امریکہ کے درمیان جاری مذاکرات کو ممکنہ حد تک سبوتاژ کرنا تھا۔ یہ مذاکرات جن سے اسرائیلی وزیر اعظم بنیامین نیتن یاہو  سخت نالاں ہیں۔

اخبار نے ایک اعلیٰ سطحی ذریعے کے حوالے سے بتایا کہ صہیونی حکام مذاکرات میں ہونے والی مثبت پیش رفت سے آگاہ ہو چکے ہیں۔

اس ذریعے نے واضح کیا کہ صہیونی حکومت کو امریکی صدر ڈونلڈ ٹرمپ کی طرف سے دی گئی تنبیہہ کے اثرات کا ادراک ہونا چاہیے، جس میں ٹرمپ نے اعلان کیا تھا کہ وہ نیتن یاہو کو امریکہ کو جنگ میں دھکیلنے کی اجازت نہیں دیں گے۔

ذرائع کے مطابق، ضاحیہ میں جس مقام کو نشانہ بنایا گیا وہ ایک غیر عسکری اور سماجی مرکز تھا، اور حملے کا مقصد زیادہ تر ایک سیاسی پیغام دینا تھا نہ کہ کسی عسکری ہدف کو نشانہ بنانا۔

اخبار الجمهوریہ نے مزید دعویٰ کیا کہ دستیاب معلومات سے معلوم ہوتا ہے کہ اسرائیلی وزیر اعظم نتانیاہو اس حملے کے ذریعے امریکہ اور ایران کے مذاکرات کو سبوتاژ کرنا چاہتے ہیں۔

 خاص طور پر ایسے حالات میں جب مذاکرات کے دوران اور بعد میں دونوں فریقین کے درمیان خوش بینی دیکھی جا رہی ہے اور کسی معاہدے تک پہنچنے کے امکانات بڑھ گئے ہیں۔

رپورٹ کے مطابق، نیتن یاہو اس حملے کو اپنے داخلی بحران سے فرار کا ایک ذریعہ بھی بنانا چاہتے ہیں ،غزہ میں جنگی اہداف میں ناکامی، مقبوضہ علاقوں میں مظاہروں اور جنگ بندی کے مطالبات کے دباؤ نے ان کی پوزیشن کمزور کر دی ہے۔

مزید پڑھیں:ایران امریکہ مذاکرات؛ 4 چیزوں پر ٹرمپ کا اتفاق

 اس تناظر میں، نیتن یاہو نے فیصلہ کیا ہے کہ کنسٹ (اسرائیلی پارلیمان) کے آئندہ انتخابات تک جنگی صورتحال کو جاری رکھا جائے تاکہ جنگ بندی کی صورت میں مخالفین کو انہیں احتساب کے کٹہرے میں لانے کا موقع نہ ملے، جو ان کے لیے سیاسی شکست اور اقتدار سے یقینی بے دخلی کا باعث بن سکتی ہے۔