نیتن یاہو یمنیوں سے ڈرنا چھوڑ دیں:صیہونی اپوزیشن لیڈر  

سچ خبریں:صیہونی اپوزیشن لیڈر یائیر لاپڈ نے نیتن یاہو سے مطالبہ کیا ہے کہ وہ یمن پر سائبر و فضائی حملے تیز کرے اور اس کے بنیادی ڈھانچے جیسے بجلی، پانی، بندرگاہوں اور ایئرپورٹس کو نشانہ بنائے۔

الجزیرہ  نیوز چینل کی رپورٹ کے مطابق اسرائیل کے سابق وزیراعظم اور اپوزیشن لیڈر یائیر لاپڈ نے قابض وزیر اعظم بنیامین نیتن یاہو پر تنقید کرتے ہوئے کہا ہے کہ اب وقت آ گیا ہے کہ نیتن یاہو خوف اور وقت ضائع کرنا چھوڑ دے اور یمن پر حملوں میں شدت لائے۔

یہ بھی پڑھیں: یمن کے بیلسٹک میزائل حملے کی انفرادیت؛اسرائیل کے دل پر کاری وار

رپورٹ کے مطابق، یمن کی جانب سے اسرائیل کے بن گورین ایئرپورٹ پر میزائل حملے کے بعد، لاپڈ نے خبردار کیا کہ اسرائیل مزید خاموش تماشائی نہیں بن سکتا،حوثی میزائل حملے اسرائیل کے لیے اجتماعی تباہی یا معاشی فالج کا سبب بن سکتے ہیں۔

انہوں نے زور دیا کہ نیتن یاہو کو چاہیے کہ یمن میں حوثیوں کے میزائل لانچ پیڈز کو نشانہ بنائے، بجلی، پانی، بندرگاہوں اور ہوائی اڈوں جیسے بنیادی ڈھانچوں پر حملے کرے، یمن کے حساس اداروں پر سائبر حملے تیز کرے تاکہ ان کی ملکی کارکردگی مفلوج ہو جائے۔

لاپڈ نے کہا، ہمیں ایسی حکومت اور وزیراعظم کی ضرورت ہے جو اپنے سائے سے نہ ڈرے اور دشمن کو نقصان پہنچانے کے لیے سرگرم ہو۔

اسی سلسلے میں صیہونی کنسٹ کے رکن اور سابق وزیر دفاع آویگدور لیبرمن نے بھی ردعمل کا اظہار کیا، انہوں نے کہا، جنگ شروع ہونے کے ایک سال سات ماہ بعد، یہ یقین کرنا مشکل ہے کہ لاکھوں اسرائیلیوں کو پھر سے پناہ گاہوں میں جانا پڑا۔

مزید پڑھیں: یمن کی مزاحمتی کارروائیاں اور صیہونیوں کی بے بسی

واضح رہے کہ ان بیانات سے قبل یمنی مسلح افواج نے اعلان کیا تھا کہ انہوں نے بن گورین ایئرپورٹ کو ایک بیلسٹک مافوق الصوت میزائل اور تل ابیب کو یافا ڈرون سے نشانہ بنایا ہے، جس سے صہیونی ریاست کی فضائی سرگرمیاں متاثر ہوئیں۔