نیتن یاہو جنگ کے بغیر زندہ نہیں رہ سکتے:صیہونی میڈیا

?️ 9 جون 2026

سچ خبریں:ایک عبری تجزیاتی ویب سائٹ نے دعویٰ کیا ہے کہ ایران کی جانب سے جنگ کے خاتمے کے اعلان کے باوجود بنیامین نیتن یاہو کشیدگی کو جاری رکھنا چاہتے ہیں، کیونکہ جنگ کے خاتمے سے انہیں سیاسی، قانونی اور عوامی دباؤ کا سامنا کرنا پڑ سکتا ہے۔

عبری زبان کے ایک ذرائع ابلاغ نے اعتراف کیا ہے کہ ایران کی جانب سے جنگ کے خاتمے کے اعلان کے باوجود صیہونی وزیراعظم بنیامین نیتن یاہو مستقل امن اور سکون کی صورتحال کو برقرار رہنے نہیں دیں گے۔

عبری تجزیاتی ویب سائٹ نیوز اسرائیل نے ایران کی جانب سے جنگ کے خاتمے کے اعلان کے چند گھنٹے بعد اپنی رپورٹ میں لکھا کہ جنگ بندی کی تجویز امریکی صدر ڈونلڈ ٹرمپ کے ذریعے ایرانی حکام تک پہنچائی گئی تھی، تاہم نیتن یاہو مستقل سکون اور استحکام کے جاری رہنے کی اجازت نہیں دیں گے۔

رپورٹ کے مطابق ٹرمپ نے ایرانیوں کو پیغام دیا تھا کہ اسرائیل کے ساتھ جنگ بندی پر اتفاق ہو چکا ہے اور اگر ایران کی جانب میزائل حملے رک گئے تو اسرائیل بھی مزید حملے نہیں کرے گا۔

تاہم رپورٹ میں دعویٰ کیا گیا ہے کہ نیتن یاہو نے فوری طور پر جنوبی لبنان میں بعض مقامات کو نشانہ بنانے کا حکم دیا تاکہ یہ تاثر دیا جا سکے کہ ایران اور لبنان دو الگ محاذ ہیں، لیکن انہیں حزب اللہ کے ردعمل کا سامنا کرنا پڑا۔

اس تجزیاتی رپورٹ میں مزید کہا گیا ہے کہ نیتن یاہو عسکری افراتفری اور مسلسل کشیدگی کے خواہاں ہیں، کیونکہ جنگ کے خاتمے کی صورت میں ان کی ذاتی اور سیاسی صورتحال مزید پیچیدہ ہو سکتی ہے۔

رپورٹ کے مطابق جنگ رکنے کے بعد صیہونی پارلیمان کی تحلیل سے متعلق قانون کی منظوری کا عمل تیز ہو سکتا ہے، جبکہ حریدی جماعتیں بھی اس قانون کی فوری منظوری کا مطالبہ کر سکتی ہیں۔

عبری میڈیا نے دعویٰ کیا کہ رائے عامہ کے جائزوں میں نیتن یاہو کی مقبولیت میں کمی واقع ہو رہی ہے اور ان کے خلاف جاری عدالتی مقدمات بھی بدستور برقرار ہیں۔

رپورٹ میں مزید کہا گیا ہے کہ جنگ کے خاتمے کے بعد بڑی تعداد میں صیہونی آبادکار نیتن یاہو سے سیاسی طور پر لاتعلقی اختیار کر سکتے ہیں اور ان کی سیاسی زندگی کے مستقل خاتمے کا مطالبہ کر سکتے ہیں۔

تجزیے کے اختتام میں دعویٰ کیا گیا کہ نیتن یاہو ہر ممکن طریقے سے جنگ کو جاری رکھنے کے خواہاں ہیں، حالانکہ اس جنگ کا سب سے بڑا نقصان صیہونی معاشرے اور صیہونی شہریوں کو برداشت کرنا پڑ سکتا ہے۔