میانمار کے فوجی حکمران نے ملک میں نئی عبوری حکومت قائم کرکے خود وزیراعظم بننے کا اعلان کردیا

?️ 2 اگست 2021

میانمار (سچ خبریں)  میانمار کے فوجی حکمران نے ملک میں نئی عبوری حکومت قائم کرکے خود وزیراعظم بننے کا اعلان کرتے ہوئے ایک بار پھر ملک میں کثیر جماعتی انتخابات کرانے کا وعدہ کیا ہے۔

تفصیلات کے مطابق میانمار کے فوجی حکمران جنرل مِن آنگ ہلینگ نے ملک میں نئی عبوری حکومت قائم کرتے ہوئے خود نگران وزیراعظم بننے کا اعلان کردیا۔

غیر ملکی خبر ایجنسی کے مطابق 6 ماہ قبل منتخب جمہوری حکومت کا تختہ الٹنے والے میانمار کے کمانڈرانچیف جنرل من آنگ نے نئی نگران حکومت کے قیام کا اعلان کیا ہے۔

سرکاری میڈیا کے مطابق جنرل من آنگ ملک کے نگران وزیراعظم ہوں گے اور جنرل سووین میانمار کے نائب وزیراعظم ہوں گے۔

نگران وزیراعظم نے ایک بار پھر ملک میں کثیر جماعتی انتخابات کرانے کا وعدہ کیا ہے۔

خیال رہے کہ رواں سال فروری میں میانمار میں فوج نے اقتدار پر قبضہ کرکے ایک سال کی ایمرجنسی نافذ کرنے کا اعلان کرتے ہوئے آنگ سان سوچی سمیت دیگر رہنماؤں کو گرفتار کرلیا تھا۔

منتخب حکومت کا تختہ الٹنے کے بعد سے میانمار میں احتجاج کے دوران سیکڑوں سیاسی کارکنوں کو گرفتار کیا جاچکا ہے، انسانی حقوق کی خراب صورتحال پر امریکا اور یورپی ممالک کی جانب سے میانمار کو سخت تنقید کا سامنا ہے۔