غرب اردن میں اسرائیلی فوج کا سرچ آپریشن، متعدد فلسطینیوں کو گرفتار کرلیا

?️ 11 اپریل 2021

غرب اردن (سچ خبریں) اسرائیلی فوج نے غرب اردن میں بڑے پیمانے پر سرچ آپریشن کرتے ہوئے متعدد فلسینیوں کو گرفتار کریا ہے۔

تفصیلات کے مطابق قابض صہیونی فوج نے فلسطین کے مقبوضہ مغربی کنارے میں گھر گھر تلاشی کی کارروائیوں کے دوران مزید 7 فلسطینیوں کو حراست میں لے لیا۔

مقامی ذرائع کے مطابق جمعہ کے روز اسرائیلی فوج نے غرب اردن کے شمالی شہر نابلس میں عراق بورین کے مقامپر چھاپہ مار کارروائی کے دوران تین فلسطینی نوجوانوں کو گرفتار کرلیا، ان کی شناخت عمرو جبران قادوسم اسامہ محمد قعدان اور احمد شفیق قادوس کے ناموں سے کی گئی ہے۔

قابض فوج نے تلاشی کے دوران ان کے گھروں میں توڑ پھوڑ اور لوٹ مار کی اور گھروں میں موجود بچوں اور خواتین کو زدو کوب کیا۔

ادھر اسرائیلی فوج نے غرب اردن کے جنوبی شہر الخلیل میں دورا کے مقام پر چھاپہ مار کارروائی کےدوران 63 سالہ حماس رہنما الشیخ رزق الرجوب کو حراست میں لے لیا۔

قبل ازیں قابض فوج نے 19 سالہ محمد غسان منصور اور 19 سالہ احمد ایاد السعدی کو صباح الخیر کے مقام سے حراست میں لیا، بیت لحم میں تلاشی کے دوران 42 سالہ رائد ابراہیم عبیات کی گرفتاری عمل میں لائی گئی۔

دوسری جانب قابض صہیونی حکومت نے مشرقی بیت المقدس میں مقامی پلاننگ وڈویلپمنٹ کمیٹی کے ذریعے یہودی آباد کاروں کے لیے 2540 مکانات کی تعمیر کی منظوری دے دی ہے۔

عبرانی اخبار’ہارٹز’ کی رپورٹ میں بتایا گیا ہےکہ اسرائیلی حکومت کی طرف سے منظور کردہ نئے گھروں میں سے 540 ابو غنیم کالونی کے باہر جبکہ 2000 مکانات گیوات ھمٹوز کالونی میں بیت صفافا کے مقام پر تعمیر کیے جائیں گے۔

بیت صفافا میں یہودی آبادکاری کے منصوبے میں مستقبل میں کسی سیاسی حل کی صورت میں القدس کی تقسیم میں رکاوٹ پیدا ہوسکتی ہے۔

واضح رہے کہ چند روز قبل اسرائیلی بلدیہ نے کہا تھا کہ وہ القدس میں بسگات زئیو کالونی میں یہودی آباد کاروں کے لیے 930 گھروں کی تعمیر پر جلد کام شروع کرے گی۔

تعمیراتی منصوبے کے تحت اسرائیلی بلدیہ نے بسغازئیو، رمات شلومو، گیلو، گیوات ھمٹوس اور دوسری کالونیوں میں تعمیرات شامل ہیں۔