اسماعیل ہنیہ کا ترکی دورہ، غرب اردن کی آزادی کے حوالے سے اہم اعلان کردیا

?️ 14 مارچ 2021

انقرہ (سچ خبریں)  فلسطین کی اسلامی تحریک مزاحمت حماس کے سیاسی شعبے کے سربراہ اسماعیل ہنیہ نے ترکی دورے کے دوران غرب اردن کی آزادی کے حوالے سے اہم اعلان کرتے ہوئے کہا ہے کہ جس طرح فلسطینی قوم نے غزہ کی پٹی سے غاصب صہیونی دشمن کو نکال باہر کیا، اسی طرح جلد ہی غرب اردن کو بھی قابض دشمن سے آزاد کرایا جائے گا۔

تفصیلات کے مطابق اسلامی تحریک مزاحمت حماس کے سیاسی شعبے کے سربراہ اسماعیل ہنیہ اپنے دورہ ترکی کے دوران گذشتہ روز ترکی کے مختلف اسپتالوں میں زیرعلاج فلسطینی زخمیوں کی عیادت کی، اس موقعے پر گفتگو کرتے ہوئے انہوں‌ نے کہا کہ فلسطینی قوم نے وطن عزیز کی آزادی کے لیے بے پناہ قربانیاں دی ہیں۔

ان کا مزید کہنا تھا کہ جس طرح قربانیاں دے کر فلسطینیوں نے غزہ کی پٹی سے غاصب صہیونی دشمن کو نکال باہر کیا، اسی طرح جلد ہی غرب اردن کو بھی قابض دشمن سے آزاد کرایا جائے گا۔

ترکی کے اسپتالوں میں غزہ میں‌ جنگ کے دوران زخمی ہونے والے فلسطینیوں کی عیادت کرتے ہوئے اسماعیل ہنیہ نے کہا کہ زخمی فلسطینی نہ صرف قوم بلکہ عرب اور مسلم اقوام کے کے سروں پرموجود تاج کے ہیرو ہیں، اپنے جسم پر گہرے زخم کھا کر انہوں‌نے فتح ونصرت کی تاریخ رقم کی ہے۔

ان کا کہنا تھا کہ شہدا کی قربانیوں اور زخمیوں کی تکالیف نے آزادی کی منزل کو قریب کردیا ہے۔

انہوں ‌نے قضیہ فلسطین اور فلسطینی قوم کے دیرینہ حقوق کی اصولی حمایت پرترک حکومت اور ترک عوام کا بھی شکریہ ادا کیا۔

واضح رہے کہ اپنے دورہ ترکی کے دوران اسماعیل ہنیہ ترک حکام سے بھی ملاقات کریں گے۔