جنگ بندی کی نئی صیہونی تجویز پر حماس کا ردعمل

سچ خبریں:فلسطینی مزاحمتی تحریک حماس کے ایک ذرائع نے انکشاف کیا ہے کہ صیہونی حکومت کی جانب سے پیش کردہ نئی تجویز نہ تو پائیدار جنگ بندی کی ضمانت دیتی ہے اور نہ ہی غزہ سے صیہونی فوج کے مکمل انخلاء کو شامل کرتی ہے،اس کے برعکس، تل ابیب اپنے تمام قیدیوں کی تدریجی رہائی کا خواہاں ہے۔

یہ بھی پڑھیں: بائیڈن کی جنگ بندی کی تجویز میں متعدد رکاوٹیں

لبنانی نشریاتی ادارے المیادین کی رپورٹ کے مطابق حماس کے ایک سینئر رہنما نے کہا ہے کہ صیہونی حکومت کی تازہ ترین مذاکراتی تجویز میں جنگ بندی شامل نہیں ہے اور یہ تجویز دراصل حماس سے قیدیوں کے معاملے پر کنٹرول چھیننے کی ایک تدریجی کوشش ہے۔

حماس کے اس ذریعے کے مطابق، اسرائیل کی تجویز میں حماس کی بنیادی شرائط یعنی مستقل جنگ بندی اور صیہونی فوج کی غزہ سے مکمل واپسی شامل نہیں ہے، اس لیے یہ تجویز ان کے لیے قابل قبول نہیں ہو سکتی۔

صیہونی تجویز کے نمایاں نکات میں سے ایک 9 اسرائیلی قیدیوں کی رہائی ہے، جن میں عیدان الکساندر نامی اسرائیلی-امریکی فوجی بھی شامل ہے۔

اس کے علاوہ 45 روزہ جنگ بندی، غزہ کے راستوں کی مشروط بحالی، اور امدادی سامان کی اسرائیلی شرائط کے مطابق ترسیل بھی تجویز کا حصہ ہے،اس منصوبے کے مطابق، صیہونی فوج ان علاقوں میں دوبارہ تعینات ہوگی جو 2 مارچ سے پہلے اس کے زیر کنٹرول تھے۔

فلسطینی ذرائع کا کہنا ہے کہ یہ تجویز مذاکرات کے دوسرے مرحلے میں داخل ہونے کے لیے تیار کی گئی ہے، جس میں مستقل جنگ بندی، غزہ سے فوجی انخلاء، حماس کے اسلحے کی ضبطی، اور غزہ کی حکمرانی کے نظام سے متعلق امور زیر بحث آئیں گے۔

مزید پڑھیں: غزہ سے قابضین کا انخلا اور جنگ روکنا اولین ترجیح ہے: حماس

اسرائیل اس بات کی ضمانت حاصل کرنا چاہتا ہے کہ مستقبل میں حماس کو غزہ پر حکمرانی کا کوئی اختیار حاصل نہ ہو،ذرائع کے مطابق، حماس نے تاحال اس تجویز پر کوئی سرکاری ردعمل نہیں دیا ہے اور اس کا جائزہ لیا جا رہا ہے۔