جنگ بندی سے حماس مزید مضبوط ہو رہی ہے:صیہونی میڈیا 

سچ خبریں:اسرائیلی اخبار یدیعوت احرونٹ نے صہیونی سکیورٹی ذرائع کے حوالے سے انکشاف کیا ہے کہ حماس نے جنگ بندی کے دوران اپنی طاقت اور کنٹرول میں اضافہ کیا ہے اور اسرائیلی فوجی کارروائیوں کے باوجود اس کے اسلحہ کے ذخائر تباہ نہیں ہو سکے۔  

یہ بھی پڑھیں:غزہ جنگ کے بعد حماس کی نئی جنگی حکمت عملی؛امریکی اخبار کی رپورٹ

الجزیرہ نیوز چینل کی رپورٹ کے مطابق صیہونی اخبار کا کہنا ہے کہ دو ہفتے گزرنے کے باوجود، قیدیوں کی مکمل آزادی کے بغیر کوئی نیا معاہدہ طے نہیں پایا۔

 اسرائیلی وزیراعظم بنیامین نیتن یاہو کے بیانات کے باوجود مذاکرات تعطل کا شکار ہو چکے ہیں۔

صیہونی اخبار کے مطابق اسرائیل کی جانب سے غزہ میں امداد کی ترسیل کو محدود کرنے کے باوجود، حالات زیادہ نہیں بدلے۔

 حماس نے 42 دن کی جنگ بندی کے دوران اپنے ذخائر بحال کر لیے ہیں اور کم از کم 4 ماہ تک کے لیے اشیائے ضروریہ اور ایندھن اکٹھا کر لیا ہے۔

 اسرائیلی دباؤ کے تمام حربے ناکام ہو چکے ہیں اور حماس نے جنگ کے لیے دوبارہ تیاری مکمل کر لی ہے۔

رپورٹ میں سکیورٹی ذرائع کے حوالے سے کہا گیا ہے کہ ہر دن جو حماس کو جنگ کے لیے تیاری کا موقع دیتا ہے، اسرائیل کے لیے ایک مہینے کی تیاری کے برابر ہے،حماس کا شہری علاقوں پر کنٹرول روز بروز بڑھ رہا ہے۔

مزید پڑھیں:فلسطینی استقامت مزید مضبوط ہو گئی ہے: حماس

اخبار کے مطابق، اگر اسٹیو وٹکاف (امریکی نمائندہ) کا جنگ بندی میں توسیع کا منصوبہ ناکام ہوتا ہے تو  اسرائیل پہلا مرحلہ برقرار رکھنے کی کوشش کرے گا اور مذاکرات کو وساطت کے ذریعے طول دینے کی حکمت عملی اپنائے گا،اسرائیلی قیدیوں کی رہائی سے متعلق سوال پر، ڈونلڈ ٹرمپ نے محتاط جواب دیتے ہوئے کہا کہ مجھے امید ہے کہ یہ مسئلہ حل ہو جائے گا، یہ ایک انتہائی پیچیدہ صورتحال ہے اور یہاں نفرت ایک غیرمعمولی سطح پر ہے۔