صیہونی حراست میں تشدد اور بدسلوکی کا سامنا کرنا پڑا؛ فرانسیسی کارکن کا انکشاف

?️ 26 مئی 2026

سچ خبریں:عالمی صمود فلوٹیلا کی فرانسیسی کارکن نے انکشاف کیا ہے کہ صیہونی فورسز نے حراست کے دوران کارکنوں کو تشدد، بھوک، تحقیر اور غیر انسانی سلوک کا نشانہ بنایا۔

عالمی صمود فلوٹیلا کی ایک فرانسیسی کارکن نے انکشاف کیا ہے کہ صہیونی حکومت کی فورسز نے مقبوضہ علاقوں میں حراست کے دوران فلوٹیلا کے کارکنوں پر تشدد اور غیر انسانی سلوک کیا۔

عالمی صمود فلوٹیلا کی فرانسیسی کارکن لاتیتسیا مرل، جو گزشتہ ہفتے فرانس واپس پہنچیں، نے پیرس میں خبر رساں ادارے اناتولی سے گفتگو کرتے ہوئے گرفتار کارکنوں کے ساتھ صیہونی فورسز کے رویے کی تفصیلات بیان کیں۔

انہوں نے کہا کہ صہیونی فورسز نے بین الاقوامی پانیوں میں فلوٹیلا کو روکنے کے بعد کارکنوں کو پانی، خوراک اور طبی سہولیات سے محروم رکھا جبکہ انہیں تشدد، مارپیٹ اور تحقیر آمیز سلوک کا سامنا بھی کرنا پڑا۔

لاتیتسیا مرل نے بتایا کہ خواتین اور مردوں کو ایک دوسرے سے الگ رکھا گیا تھا، ان کے مطابق صیہونی اہلکار کارکنوں کو اسرائیل زندہ باد کے نعرے لگانے پر مجبور کرتے تھے اور انکار کی صورت میں ان کے ساتھ تشدد کیا جاتا تھا۔

انہوں نے مزید کہا کہ بعض کارکنوں، جن میں دو ترک شہری بھی شامل تھے، کو شدید تشدد کا نشانہ بنایا گیا جبکہ گرفتار خواتین کے ساتھ جسمانی تلاشی، اسکارف کھینچنے اور پولیس کتوں کے ذریعے دھمکانے جیسے اقدامات کیے گئے۔

فرانسیسی کارکن نے زور دے کر کہا کہ عالمی صمود فلوٹیلا کے مسافروں کا مقصد دنیا کی توجہ فلسطینی عوام کی حالت زار کی طرف مبذول کرانا تھا، اور دوران حراست جو کچھ انہوں نے برداشت کیا، وہ دراصل فلسطینیوں کی روزمرہ مشکلات کا ایک چھوٹا سا حصہ ہے۔