مصری وزیر خارجہ کا اسرائیل سے گیس خریداری کے معاہدے پر وضاحت

?️ 29 دسمبر 2025

سچ خبریں:مصر کے وزیر خارجہ نے اسرائیل سے گیس خریداری کے معاہدے کو صرف اقتصادی اور تجارتی سمجھوتہ قرار دیا اور سیاسی مفاہمت کی افواہوں کی تردید کی۔

مصر کے وزیر خارجہ نے کہا کہ اسرائیل سے گیس خریدنے کا طویل المدتی معاہدہ صرف ایک اقتصادی اور تجارتی سمجھوتہ ہے جو مصر، امریکہ اور اسرائیل کی کمپنیوں کے درمیان طے پایا ہے اور اس کا سیاست سے کوئی تعلق نہیں ہے۔

یہ بھی پڑھیں:اسرائیل کے ساتھ گیس معاہدے کا سیاسی معاملات سے کوئی تعلق نہیں: مصر

عبدالعاطی نے ایم بی سی مصر کے ساتھ خصوصی انٹرویو میں اسرائیل سے گیس خریداری کے معاہدے کے پیچھے سیاسی شرائط یا کسی سیاسی مفاہمت کے بارے میں افواہوں کی تردید کی اور کہا کہ مصر اس معاملے میں مکمل اعتماد کے ساتھ آگے بڑھ رہا ہے۔

انہوں نے مزید کہا کہ کسی بھی غیر ملکی فریق کے گیس کی فراہمی پر اثر انداز ہونے کا دعویٰ حقیقت سے بعید ہے، خاص طور پر یہ کہ اسرائیل سے آنے والی گیس کا کچھ حصہ مصر میں مائع گیس میں تبدیل ہو کر دوبارہ برآمد کیا جاتا ہے۔

وزیر خارجہ نے کہا کہ مصر کے پاس ایڈکو اور دمیاط میں دو بڑے گیس مائع بنانے کے کارخانے ہیں، جس کی وجہ سے مصر ایک منفرد اسٹریٹجک فائدہ رکھتا ہے اور یہ ملک گیس کو وصول اور مائع بنا کر دوبارہ برآمد کرنے کا مرکز بن چکا ہے۔

عبدالعاطی نے کہا کہ مستقبل میں قبرص کا گیس بھی مصر آئے گا، جہاں اسے مائع گیس میں تبدیل کر کے دوبارہ برآمد کیا جائے گا۔

وزیر خارجہ نے اس بات پر بھی زور دیا کہ مصر کے پاس توانائی کے مختلف وسائل ہیں اور وہ کسی ایک ذریعہ پر منحصر نہیں ہے۔ مصر توانائی کے نئے اور تجدیدی ذرائع جیسے سورج، ہوا اور ہائیڈروجن کو بڑھا کر 2035 تک ان کی شرح کو 42 فیصد تک پہنچانے کا ارادہ رکھتا ہے۔

مزید پڑھیں: اسرائیل،مصر گیس معاہدے کی تاخیر سے قطر نے موقع سے فائدہ اٹھایا

عبدالعاطی نے مزید بتایا کہ نائل ڈیلٹا اور مغربی مصر کے بیابان علاقوں میں نئے تیل اور گیس کے ذخائر دریافت ہوئے ہیں۔