یہودی آبادکاروں کی جانب سے قبلہ اول کی بے حرمتی، مصر نے شدید مذمتی بیان جاری کردیا

?️ 20 جولائی 2021

قاہرہ (سچ خبریں) یہودی آباد کاروں کی جانب سے قبلہ اول کی بے حرمتی کا سلسلہ جاری ہے جس کو دیکھتے ہوئے مصر نے شدید مذمتی بیان جاری کرتے ہوئے کہا کہ مصر مسجد اقصیٰ کی بے حرمتی کی تمام اسرائیلی کارروائیوں کو مسترد کرتا ہے۔

تفصیلات کے مطابق مصر نے اسرائیلی فوج اور پولیس کی فول پروف سیکیورٹی میں اتوار کے روز ایک ہزار سے زاید یہودی آباد کاروں کے قبلہ اول پر دھاوے کی شدید مذمت کی ہے۔

مصری وزارت خارجہ کے ترجمان احمد حافظ نے ایک بیان میں کہا کہ مصر مسجد اقصیٰ کی بے حرمتی کی تمام اسرائیلی کارروائیوں کو مسترد کرتا ہے۔

انہوں نے خبردار کیا کہ مصر بار بار اسرائیل کو مسجد اقصیٰ کی بے حرمتی پر خبردار کرچکا ہے، مصر نے کئی بار اسرائیل پر واضح کیا ہے کہ مسجد اقصیٰ پوری عالم اسلام کے دلوں میں اہم مقام رکھتی ہے اور اس کی بے حرمتی اور اس کے تقدس کی پامالی برداشت نہیں کی جاسکتی۔
ترجمان نے مزید کہا کہ مسجد اقصیٰ صرف مسلمانوں کا مذہبی مقام ہے اور  عالم اسلام اسے غیرمعمولی قدر کی نگاہ سے دیکھتے ہیں۔

واضح رہے کہ اتوار 18 جولائی کو1200 یہودی آبادکاروں، اسرائیلی طلبا اور انٹیلی جنس اہلکاروں سمیت درجنوں انتہا پسندوں نے قبلہ اول میں گھس کر اشتعال انگیز چکر لگائے۔

یہودی آبادکار مراکشی دروازے کے راستے مسجد اقصیٰ کے صحن میں داخل ہوئے، اس موقعے پر انتہا پسند یہودی شرپسندوں کو مزعومہ ہیکل سلیمانی کے بارے میں مذہبی بریفنگ بھی دی گئی۔

خیال رہے کہ جمعہ اور ہفتہ کے دن کے علاوہ ہفتے کے باقی ایام میں یہودی آبادکار مسجد اقصیٰ پر دھاوے بولتے اور تلمودی تعلیمات کے مطابق مسجد اقصیٰ کی حرمت کو پامال کرنے والے اشتعال انگیز اقدامات اور حرکات کرتے ہیں۔

یہودی آبادکاروں کو قبلہ اول پر دھاووں کے لیے فول پروف سیکیورٹی فراہم کی جاتی ہے جب کہ فلسطینیوں کو قبلہ اول میں نماز کی ادائی سے روکنے کے لیے طاقت کے استعمال سمیت طرح طرح کے حربے استعمال کیے جاتے ہیں۔

مسجد اقصیٰ پر یہودی آبادکاروں کے یہ دھاوے غیرمعمولی اور غیر مسبوق ہیں اور عرب ممالک اور عالم اسلام کی طرف سے قبلہ اول کی بے حرمتی کی شدید مذمت کی جا رہی ہے۔