افغانستان میں بم دھماکے اور ہیلی کاپٹر حادثے میں 5 سیکیورٹی اہلکاروں سمیت درجنوں افراد ہلاک اور زخمی ہوگئے

?️ 18 مارچ 2021

کابل (سچ خبریں) افغانستان میں ایک بس میں بم دھماکے اور ہیلی کاپٹر حادثے میں 5 سیکیورٹی اہلکاروں درجنوں افراد ہلاک اور زخمی ہوگئے ہیں تاہم ابھی تک اس بات کا پتہ نہیں چلا ہے کہ ہیلی کاپٹر پر راکٹ حملہ کیا گیا یا پھر اچانک سے حادثے کا شکار ہوگیا۔

تفصیلات کے مطابق افغان آرمی کا ہیلی کاپٹر گرنے اور بس پر بم دھماکے کے نتیجے میں 5 سیکیورٹی اہلکاروں سمیت 9 افراد ہلاک ہوگئے ہیں۔

افغان وزارت دفاع کے مطابق صوبے میدان وردک میں فوجی ہیلی کاپٹر ایم آئی 17 کریش لینڈنگ کے باعث تباہ ہوگیا جس کے نتیجے میں 5 سیکیورٹی اہلکاروں سمیت 9 افراد ہلاک ہوگئے جب کہ واقعہ کی تحقیقات شروع کردی گئی ہیں۔

افغان ذرائع کے مطابق 4 فوجی ہیلی کاپٹرز ضلع بہسود میں سامان اور کھانے کے اشیاء لیکر جارہے تھے تاہم لینڈنگ کے دوران نامعلوم افراد نے راکٹ فائر کیا جس کی وجہ سے ایک ہیلی کاپٹر گر کر تباہ ہوگیا تاہم ابھی تک حکام نے راکٹ حملے کی تصدیق نہیں کی ہے۔
دوسری جانب دارالحکومت کابل میں سرکاری ملازمین کی بس کو دھماکے کا نشانہ بنایا گیا جس کے باعث 3 افراد ہلاک اور 11 زخمی ہوگئے جن کو اسپتال منتقل کردیا گیا ہے جب کہ دھماکے کی ذمہ داری کسی بھی گروپ کی جانب سے قبول نہیں کی گئی۔

عرب نیوز کے مطابق وزرات دفاع نے ہیلی کاپٹر کے حادثے کی تصدیق کی ہے، وزارت دفاع کے بیان میں کہا گیا ہے کہ صوبہ میدان وردک میں پیش آنے والے اس حادثے کی تحقیقات کی جا رہی ہیں، بیان کے مطابق ہلاک ہونے والوں میں ہیلی کاپٹر کے عملے کے ساتھ خصوصی فورس کے اہلکار بھی شامل تھے۔

خبر رساں ادارے روئٹرز کے مطابق فضائیہ کے ایک ذریعے اور ایک عہدیدار نے بتایا ہے کہ ہیلی کاپٹر کو اڑان بھرتے ہوئے ایک راکٹ سے نشانہ بنایا گیا۔
خیال رہے کہ افغانستان میں طالبان جنگجو فوج کو نشانہ بناتے رہتے ہیں۔