لبنان میں صہیونی جاسوس کی گرفتاری کی تفصیلات

26 جنوری 2025

سچ خبریں:لبنان کے ذرائع نے صہیونی حکومت کے ایک جاسوس کی گرفتاری کی تصدیق کرتے ہوئے اس کی تفصیلات فراہم کی ہیں۔

الجزیرہ نیوز چینل کی رپورٹ کے مطابق، لبنان کی جنرل سیکیورٹی ایجنسی نے ایک بیان میں اعلان کیا کہ ایک شخص کو مقبوضہ فلسطین سے واپسی کے دوران صہیونی حکومت کے ساتھ تعاون کے الزام میں گرفتار کیا گیا ہے۔

یہ بھی پڑھیں: صیہونی جاسوس لبنانی فوج کے ہاتھوں گرفتار

یہ گرفتاری لبنان کے جنوبی علاقے النبطیہ میں سیکیورٹی فورسز کی جانب سے سخت نگرانی اور مسلسل مانیٹرنگ کے بعد ممکن ہوئی۔ یہ شخص، جو خفیہ طور پر مقبوضہ فلسطین میں داخل ہوا تھا، واپسی پر بنت جبیل کے علاقے میں گرفتار کیا گیا۔

گرفتار شخص نے تحقیقات کے دوران یہ اعتراف کیا کہ اس نے غزہ جنگ کے آغاز کے بعد صہیونی حکومت کے لیے جاسوسی کا کام شروع کیا، اس نے ان مشنوں پر عمل کیا جو اسرائیلی حکام نے اسے سونپے تھے۔

مزید برآں، ملزم نے یہ بھی تسلیم کیا کہ اسے صہیونی حکومت کی طرف سے ایک جدید ٹیکنالوجی سے لیس ڈیوائس فراہم کی گئی تھی، جس کا مقصد لبنان کے اہم مراکز کی نگرانی اور تصاویر حاصل کرنا تھا، یہ ڈیوائس براہ راست دشمن کے اہلکاروں کے ساتھ رابطے کی سہولت بھی فراہم کرتی تھی۔

ملزم نے بتایا کہ صہیونی حکام نے جاسوسی کے معاوضے کے طور پر اسے ایک جیکٹ فراہم کی، جس کے اندر بڑی مقدار میں رقم چھپائی گئی تھی۔ سیکیورٹی حکام نے ملزم کے قبضے سے تمام آلات، بشمول وہ سامان جو اس کے گھر کی تلاشی کے دوران برآمد ہوا، ضبط کر لیا۔

مزید پڑھیں: یمن میں امریکی اور صیہونی جاسوسی کی ناکامی

ملزم کو مزید تحقیقات اور قانونی کارروائی کے لیے لبنانی فوج کی انٹیلیجنس ڈپارٹمنٹ کے حوالے کر دیا گیا ہے، ضبط شدہ آلات کو بھی مزید تجزیے کے لیے محفوظ کر لیا گیا ہے۔