اسرائیل پر تنقید جرم نہیں:امریکی سینیٹر 

سچ خبریں:امریکی سینیٹر برنی سینڈرز نے ترک نژاد طالبہ رومیسا اوزتورک کی گرفتاری کو آزادی بیان کی خلاف ورزی قرار دیتے ہوئے اسرائیل پر تنقید کو جرم بنانے کی مذمت کی، انہوں نے امریکی آئین کے احترام اور طلبہ کی فوری رہائی کا مطالبہ کیا۔

ترقی پسند امریکی سینیٹر برنی سینڈرز نے اسرائیل کے حق میں امریکی حکومت کی غیر مشروط پالیسیوں پر شدید تنقید کرتے ہوئے کہا ہے کہ آزادی بیان کو دبانا ناقابل قبول ہے۔

یہ بھی پڑھیں: امریکی کانگریس نے اسرائیل پر تنقید کرنے والی رکن کے ساتھ کیا کیا؟

قطر کے نشریاتی ادارے الجزیرہ کی رپورٹ کے مطابق، سینڈرز نے ترک نژاد طالبہ رومیسا اوزتورک کی گرفتاری پر سخت ردعمل ظاہر کرتے ہوئے کہا کہ کسی کو صرف اس وجہ سے قید نہیں کیا جا سکتا کہ اُس نے اسرائیل پر تنقیدی کالم لکھا ہو، یہ انصاف اور آئین کی صریح خلاف ورزی ہے۔

انہوں نے زور دیا کہ رومیسا کو فوری طور پر رہا کیا جانا چاہیے اور صدر ڈونلڈ ٹرمپ سمیت تمام سیاسی رہنماؤں کو امریکی آئین، خصوصاً متمم اول کا مطالعہ کرنا چاہیے جو آزادی اظہار کی ضمانت دیتا ہے۔

اس بیان سے چند روز قبل، امریکہ کی معروف کولمبیا یونیورسٹی نے 65 فلسطین حامی طلبہ کو معطل کر دیا تھا۔ ان طلبہ نے دو روز قبل یونیورسٹی کی لائبریری میں اسرائیلی پالیسیوں کے خلاف پُرامن احتجاج کیا تھا۔

برنی سینڈرز نے امریکہ کی جامعات میں تنقید بر اسرائیل کو جرم بنانے کی پالیسیوں کی مذمت کرتے ہوئے کہا کہ ایک منظم مہم کے تحت اساتذہ اور طلبہ کو فلسطین کی حمایت پر سزا دی جا رہی ہے، جو جمہوریت کے اصولوں کی توہین ہے۔

مزید پڑھیں:صہیونی لابی اسرائیل پر تنقید کی سب سے بڑی رکاوٹ ہے:امریکی سینیٹر  
سینڈرز نے واضح کیا کہ موجودہ حالات میں امریکہ میں سیاسی دباؤ کی وجہ سے فلسطین کے حامی افراد کی آواز کو دبانے کی منظم کوشش کی جا رہی ہے، جو نہ صرف غیر جمہوری بلکہ انسانی حقوق کی بھی خلاف ورزی ہے۔