عالمی سطح پر صیہونی مظالم کے خلاف مظاہرے؛ رفح میں فلسطینی پناہ گزینوں کے قتل عام کی مذمت

?️ 28 مئی 2024

سچ خبریں: لندن، بغداد، پیرس، استنبول اور مراکش سمیت دنیا بھر میں ہزاروں لوگوں نے مظاہرے کیے اور صیہونی حکومت کی رفح میں وحشیانہ کارروائی اور فلسطینی پناہ گزینوں کے قتل عام کی شدید مذمت کی۔

دنیا بھر کے مختلف ممالک کے لوگوں نے مظاہرے کرتے ہوئے رفح میں قابض افواج کی گزشتہ رات کی بربریت کی مذمت کی اور غزہ کی جنگ بندی اور صیہونی حکومت کے مظالم کے خاتمے کا مطالبہ کیا۔

یہ بھی پڑھیں: عالمی عدالت انصاف کا اسرائیل کو رفح پر حملہ روکنے کا حکم

اسی سلسلے میں برطانیہ کے شہر مانچسٹر میں ہزاروں افراد نے پیر کے روز مظاہرہ کرتے ہوئے رفح میں قتل عام کی مذمت کی اور بین الاقوامی عدالت انصاف کے فیصلے پر عملدرآمد کرنے اور جنگ کے فوری خاتمے کا مطالبہ کیا۔

دوسری جانب استنبول میں ایک بڑے مظاہرے میں غزہ اور فلسطین کی حمایت اور رفح میں فلسطینی پناہ گزینوں کے وحشیانہ قتل عام کی مذمت کی گئی۔

بحرین کے عوام نے بھی تل ابیب کے خلاف بڑے پیمانے پر مظاہرے کرتے ہوئے رفح کے قتل عام کی مذمت کی اور صیہونی حکومت کے ساتھ تعلقات معمول پر لانے کے عمل کو ختم کرنے کا مطالبہ کیا۔

اسی طرح فرانس میں ایک اور مظاہرے میں فلسطین کے حامیوں نے رفح میں فلسطینی پناہ گزینوں کے قتل عام کی مذمت کی۔

مغربی کنارے کے شہر جنین میں بھی سینکڑوں فلسطینیوں نے قابض افواج کے خلاف نعرے لگاتے ہوئے رفح میں فلسطینیوں کے قتل عام کی مذمت کی۔

الجزیرہ نے ایک غیر معمولی خبر میں، مقبوضہ حیفا شہر میں فلسطین کے حامیوں کی ایک ریلی کی خبر دی ہے۔

اردن کے دارالحکومت عمان میں اسرائیلی سفارتخانے کے سامنے بھی لوگوں نے اسرائیل کے رفح میں ہولناک جرم کے خلاف مظاہرہ کیا۔

بغداد کے لوگوں نے بھی غزہ کی حمایت اور رفح میں صیہونی قابض افواج کے نسل کشی کی مذمت کرتے ہوئے اسرائیل مخالف مظاہرے کیے۔

مزید پڑھیں: رفح میں صہیونیوں کے جرم پر سعودی عرب کا ردعمل

یاد رہے کہ اتوار کی رات، صیہونی حکومت کے جارحانہ جنگی طیاروں نے جنوبی غزہ کی پٹی میں شمال مغربی رفح شہر میں فلسطینی پناہ گزینوں کے خیموں پر بمباری کی۔

اس بربریت میں اب تک 40 سے زیادہ فلسطینی شہید اور درجنوں زخمی ہو چکے ہیں جبکہ ملبے تلے دبے افراد کی تلاش جاری ہے۔