الجولانی حکومت کا مشہور صیہونی جاسوس کی باقیات واپس کرنے کا اعلان

سچ خبریں:الجولانی حکومت نے صیہونی حکومت کے ساتھ تعلقات معمول پر لانے اور امریکی حمایت حاصل کرنے کے لیے موساد کے مشہور جاسوس ایلی کوہن کا آرکائیو اور ذاتی سامان اسرائیل کے حوالے کر دیا ہے، اس اقدام کو موساد نے بڑی اخلاقی کامیابی قرار دیا ہے۔

روئٹرز خبر رساں ادارے کی رپورٹ کے مطابق الجولانی حکومت نے اسرائیل سے دشمنی کم کرنے اور امریکہ سے تعلقات بہتر بنانے کی کوشش کے تحت، موساد کے مشہور جاسوس ایلی کوہن کا ذاتی آرکائیو اور دیگر اہم دستاویزات اسرائیل کے حوالے کر دی ہیں۔

یہ بھی پڑھیں:الجولانی کی صہیونی ریاست سے تعلقات بہتر بنانے کی پیشکش 

تین باخبر ذرائع نے روئٹرز کو بتایا کہ الجولانی حکومت نے صہیونی جاسوس ایلی کوہن کے ذاتی سامان اور دستاویزات کی واپسی پر اسرائیل سے اتفاق کیا ہے تاکہ اسرائیل کے ساتھ کشیدگی کم کی جا سکے اور امریکی صدر ڈونلڈ ٹرمپ کے سامنے اپنی حسن نیتی کا اظہار کیا جا سکے۔

اتوار کے روز اسرائیل نے تصدیق کی کہ ایلی کوہن سے متعلق اہم اسناد، تصاویر اور ذاتی اشیا بازیاب کر لی گئی ہیں۔ موساد کے مطابق، یہ آرکائیو ایک غیر ملکی انٹیلی جنس ادارے کی مدد سے ایک خفیہ آپریشن کے ذریعے اسرائیل واپس پہنچایا گیا ہے۔

ذرائع کا کہنا ہے کہ آرکائیو کی واپسی دراصل جولانی حکومت کی طرف سے اسرائیل کے لیے خیر سگالی کا اشارہ ہے، جو اپنی پوزیشن مضبوط کرنے اور ٹرمپ انتظامیہ کے اعتماد کو حاصل کرنے کی کوشش کر رہی ہے۔

ایلی کوہن، جنہیں 1965 میں دمشق میں سر عام پھانسی دی گئی تھی، اسرائیل میں اب بھی قومی ہیرو اور موساد کے سب سے بڑے جاسوس کے طور پر جانے جاتے ہیں۔ ان کی فراہم کردہ حساس عسکری معلومات نے 1967 کی جنگ میں اسرائیل کی کامیابی میں اہم کردار ادا کیا تھا۔

اسرائیلی وزیر اعظم بن یامین نیتن یاہو نے اتوار کو ایلی کوہن کو ایک افسانوی اور تاریخ کے عظیم ترین انٹیلی جنس افسر قرار دیا،موساد نے آرکائیو کی واپسی کو انتہائی اعلیٰ اخلاقی قدر کی کامیابی قرار دیا ہے۔

یاد رہے کہ تل ابیب کئی سالوں سے ایلی کوہن کی باقیات کی واپسی کی کوشش کر رہا ہے، لیکن یہ آرکائیو تقریباً 60 سال تک شامی انٹیلی جنس کی تحویل میں رہا۔

مزید پڑھیں: الجولانی کا تل ابیب کے لیے قیمتی تحفہ

ابھی تک صہیونی حکام نے اس آپریشن کی مکمل تفصیلات جاری نہیں کیں، صرف یہ کہا گیا کہ یہ موساد اور ایک غیر ملکی انٹیلی جنس ادارے کے مشترکہ خفیہ آپریشن کا نتیجہ ہے۔