عراق میں شہید رہبر کی تشییع کے لیے ہلالِ احمر کی مکمل تیاری

?️ 3 جولائی 2026

سچ خبریں: ایران کے ہلالِ احمر نے اعلان کیا ہے کہ عراق میں شہید رہبر انقلاب کی تشییع جنازہ کے موقع پر امدادی اور طبی خدمات فراہم کرنے کے لیے مکمل طور پر تیار ہے۔

ہلالِ احمر کے ترجمان مجتبی خالدی نے جمعے کے روز ایرانی خبر رساں ادارے ایرنا سے گفتگو کرتے ہوئے کہا کہ عراق میں ہلالِ احمر کے پہلے سے قائم طبی مراکز اور موبائل امدادی یونٹس، عتبات عالیات اور زیارتی شہروں میں موجود ہیں، جو اس موقع پر امدادی خدمات فراہم کریں گے۔

انہوں نے کہا کہ ایران اور عراق کے ہلالِ احمر اداروں کے درمیان مناسب ہم آہنگی موجود ہے، اور کسی بھی ہنگامی صورتحال میں فوری امدادی کارروائی کے لیے مکمل تیاری کر لی گئی ہے۔

ان کے مطابق، سرحدی علاقوں میں جہاں زائرین کی آمد و رفت متوقع ہے، امدادی ٹیمیں تعینات ہوں گی۔ یہ تمام اقدامات روزمرہ سرگرمیوں کے علاوہ ہوں گے، جبکہ ریسکیو ٹیمیں ملک کے مختلف راستوں پر بھی اپنی معمول کی خدمات جاری رکھیں گی۔

مجتبیٰ خالدی نے مزید بتایا کہ ایک اہم اقدام کے طور پر نفسیاتی مدد فراہم کرنے والی ٹیمیں بھی متحرک رہیں گی۔ ہلالِ احمر کی نوجوان تنظیم اور رضاکار یونٹ کے تحت “نفسیاتی معاونت ٹیمیں” اور “سحر ٹیمیں” عوام کے ساتھ موجود ہوں گی۔

انہوں نے کہا کہ مشاورتی ہیلپ لائن دوبارہ فعال کر دی جائے گی تاکہ لوگ نفسیاتی اور مشاورتی خدمات حاصل کر سکیں۔

ان کے مطابق، ہلالِ احمر کے ایمرجنسی آپریشن سینٹرز، مرکزی امدادی ادارہ، صوبائی دفاتر اور معاون مراکز مکمل طور پر فعال ہوں گے۔ ساتھ ہی جدید ڈیٹا مانیٹرنگ اور معلوماتی مرکز تمام کارروائیوں کی لمحہ بہ لمحہ نگرانی کرے گا۔

ترجمان نے بتایا کہ تمام عملی تیاریوں کو مقررہ وقت سے 48 گھنٹے قبل مکمل کر لیا جائے گا اور تنظیم تقریب کے اختتام تک مکمل ہائی الرٹ پر رہے گی۔

ایران میں قائم مرکزی کمیٹی برائے تشییع کے سیکریٹری علی اکبر پورجمشیدیان نے کہا کہ منصوبے کے مطابق 17 جولائی کو شہید رہبر کے جسد خاکی کو عراق منتقل کیا جائے گا۔

انہوں نے بتایا کہ بغداد یا نجف کے کسی ہوائی اڈے پر باضابطہ استقبال کیا جائے گا، جس میں عراق کے اعلیٰ حکام، رہنما اور وزیراعظم بھی شریک ہوں گے۔ بعد ازاں کربلا اور نجف اشرف میں، خصوصاً حرم امیرالمؤمنین حضرت علیؑ میں، تدفین اور زیارت کے مراسم انجام دیے جائیں گے۔

انہوں نے کہا کہ یہ پروگرام ایران اور عراق کے اداروں کی مشترکہ کوششوں اور عوامی شرکت کے ساتھ طے شدہ شیڈول کے مطابق منعقد کیا جائے گا۔

پورجمشیدیان کے مطابق، عراق میں اس بین الاقوامی سطح کی تقریب کا انعقاد اس رہبر شہید کی مذہبی و فقہی حیثیت اور مرجعیت کی وجہ سے ہے۔ ان کے بقول، عراقی عوام، حکومت، پارلیمان اور قبائلی رہنماوں نے مطالبہ کیا کہ ان کی آخری رسومات عراق میں ادا کی جائیں۔

انہوں نے مزید کہا کہ منصوبہ بندی کے مطابق شہید رہبر کے جسد خاکی کو عراق کے مقدس شہروں میں زیارت کے لیے بھی لے جایا جائے گا۔