ہم امریکہ کے سامنے ہتھیار نہیں ڈالیں گے: بین الاقوامی فوجداری عدالت کے صدر

سچ خبریں: بین الاقوامی فوجداری عدالت (آئی سی سی) کی جاپانی نژاد صدر جج ٹوموکو آکانے نے امریکہ کی جانب سے اس عالمی ادارے اور خود ان کے خلاف عائد کردہ پابندیوں کے ردعمل میں اعلان کیا ہے کہ اگر خود بین الاقوامی فوجداری عدالت کو بھی پابندیوں کا نشانہ بنایا جائے تو ہم تسلیم نہیں کریں گے۔

بین الاقوامی فوجداری عدالت کی جاپانی صدر نے مزید کہا کہ ہمارا عزم پختہ ہے۔ ہمیں اس مستقل ادارے کو منہدم ہونے کی اجازت نہیں دینی چاہیے۔ ہمیں اس ادارے کو تباہ ہونے نہیں دینا چاہیے اور ہم اپنی پوری طاقت کے ساتھ اس کے خلاف مزاحمت کریں گے۔

ٹوموکو آکانے نے مزید کہا کہ ممکن ہے کچھ کمزور ممالک ہوں جو امریکی دباؤ کے آگے جھک جائیں اور بین الاقوامی فوجداری عدالت سے علیحدگی کا فیصلہ کریں۔ آئیے ہم سب متحد ہو کر کھڑے رہیں تاکہ کوئی ملک اس ادارے سے نہ نکلے۔ آئیے سب مل کر مضبوطی سے قائم رہیں۔

واضح رہے کہ امریکی محکمہ خزانہ نے گزشتہ منگل کو ایک بیان میں بین الاقوامی فوجداری عدالت کی صدر کے خلاف پابندیوں کا اعلان کیا تھا۔

ان پابندیوں کا نشانہ عدالت کی صدر جاپانی جج توموکو آکانے اور سینیگالی جج عبداللہ یایا سو کو بنایا گیا۔

اس سے قبل امریکی وزیرخارجہ مارکو روبیو نے کہا تھا کہ ہم حکومت کے پاس موجود ہر ذریعے اور ہر ممکن اتحادی کے ساتھ تعاون کرتے ہوئے بین الاقوامی فوجداری عدالت کو ختم کر دیں گے اور اگر ضرورت پڑی تو اس کی اینٹ سے اینٹ بجا دیں گے۔

امریکہ کی اس عدالت سے ناراضگی ڈونالڈ ٹرمپ کی پہلی صدارتی مدت کے دور سے جڑی ہے، جب اس قانونی ادارے نے افغانستان میں امریکی افواج کے ممکنہ جنگی جرائم کی تحقیقات کی کوشش کی تھی۔

ٹرمپ کی دوسری صدارتی مدت کے دوران امریکہ اور صہیونی ریاست کے جرائم کی تحقیقات کی کوششوں کے باعث عدالت کے حکام کے خلاف پابندیوں کا ایک سلسلہ عائد کیا گیا۔