ہزاروں شہیدوں کے خون سے سینچی ہوئی سرزمین کے مالک فلسطینی عوام ہیں:حماس

?️ 9 جنوری 2022

سچ خبریں:فلسطین کی مزاحمتی تحریک حماس نے سرزمین فلسطین اور مقدس مقامات کی آزادی کے لیے اپنی جانیں قربان کرنے پر فلسطینی عوام کی تیاری پر تاکید کرتے ہوئے کہاکہ ہزاروں شہداء کے خون سے سینچی ہوئی سرزمین کے مالک فلسطینی عوام ہیں جنہوں نے کبھی ظلم و ستم کے سامنے ہتھیار نہیں ڈالے۔
فلسطینی اسلامی مزاحمتی تحریک حماس کے سیاسی بیورو کے رکن اور شہداء، قیدیوں اور زخمیوں کے امور کے نگراں دفتر کے سربراہ زاهر جبارین نے کہا کہ فلسطینی عوام اس دن کا انتظار کر رہے ہیں جب وہ آزادانہ، فاتحانہ اور وقار کے ساتھ مسجد الاقصیٰ میں داخل ہوں گے۔

پریس کانفرنس سے خطاب کرنے والے زاهر جبارین نے مزید کہاکہ شہداء کی قربانیاں فخر، غیرت اور وقار کے تمام تصورات کا کرشمہ ہیں، ہم ان ہیروز شہداء کی ہمت کے آگے سر تسلیم خم کرتے ہیں، انھوں نے کہا کہ جب تک شہداء کی قربانیوں کی یاد زندہ اور پائیدار ہے، ان کی زندگی کا خاتمہ شہادت سے نہیں ہوگا، شہداء اور اسیران ہمیں استحکام، چیلنجوں سے ٹکراؤ اور میدان میں اترنے کا سبق دیتے ہیں۔

انہوں نے سنہ 1948 میں فلسطین پر قبضے کے آغاز سے لے کر اب تک ایک لاکھ فلسطینیوں اور اسرائیلی جیلوں میں 554 فلسطینیوں کی شہادت کا ذکر کرتے ہوئے تاکید کی کہ فلسطینی عوام ہزاروں شہداء کے خون سے سینچی ہوئی ایک بابرکت سرزمین کے مالک ہیں جنہوں نے کبھی بھی ظلم و ستم کے آگے سر نہیں جھکایا۔

حماس کے سینئر رکن نے آخر میں کہاکہ فلسطین کی سرزمین مستحق ہے کہ ہم اپنے قیمتی ترین اثاثے کو اس پر قربان کر دیں ، ہم فلسطین اور اس کے پرچم بردار القدس اور مسجد اقصیٰ کی فتح اور آزادی کے لیے اپنی جانیں قربان کرنے کے لیے تیار ہیں۔